రాజ్ నాథ్ తో అమర్ సింగ్ చర్చలు

న్యూఢిల్లీ‌: బిజెపి అధ్యక్షుడు రాజ్ నాథ్ సింగ్ తో సమాజ్ వాదీ పార్టీ నేత అమర్ సింగ్ గురువారం చర్చలు జరపడం ఆసక్తిని రేకెత్తిస్తోంది. ఒక కార్యక్రమంలో వీరిద్దరూ కలిసి మంతనాలు జరిపారు. రాజ్ నాథ్ అతిథిగా హాజరైన ఒక పెళ్లి కార్యక్రమానికి అమర్ సింగ్ కూడా వచ్చారు. అక్కడే వీరిద్దరూ మాట్లాడుకున్నారు.

ఈ నెల 16వ తేదీన ఫలితాలు వెలువడే వరకు వేచి చూద్దామనే నిర్ణయానికి ఈ ఇద్దరు నేతలు వచ్చినట్లు చెబుతున్నారు. బిఎస్పీని దూరంగా పెడితే సమాజ్ వాదీ పార్టీ, బిజెపి కలిసి పనిచేయడానికి అవకాశాలున్నాయని బిజెపి నాయకుడొకరు వ్యాఖ్యానించారు. తాము అన్ని రకాలుగా ప్రయత్నాలు చేస్తున్నామని, ఎస్పీతో జత కట్టడానికి కూడా సిద్ధంగా ఉన్నామని మరో బిజెపి నాయకుడు చెప్పారు.