తెలంగాణ తీర్మానంతో ఢిల్లీకి: నాయని

హైదరాబాద్: తెలంగాణ రాష్ట్ర ఏర్పాటుకు శాసనసభలో తీర్మానం చేయించి తాము ఢిల్లీకి వెళ్తామని తెలంగాణ రాష్ట్ర సమితి (తెరాస) నాయకుడు నాయని నర్సింహారెడ్డి చెప్పారు. శాసనసభలో తెలంగాణ రాష్ట్ర ఏర్పాటుకు తీర్మానం చేస్తామని తెలుగుదేశం పార్టీ అధ్యక్షుడు నారా చంద్రబాబు నాయుడు చెప్పారని, ఆ మేరకు శాసనసభ ఏర్పాటు కాగానే తీర్మానం కోసం మహాకూటమితో ఉంటున్నామని ఆయన శుక్రవారం మీడియా ప్రతినిధులతో చెప్పారు.

తెలంగాణ రాష్ట్ర ఏర్పాటుకు చర్యలు తీసుకుంటుందనే ఉద్దేశంతోనే తాము ఎన్డీయెకు మద్దతిస్తున్నామని ఆయన చెప్పారు. శాసనసభ తీర్మానంతో ఢిల్లీకి వెళ్లి అందుకు ఏర్పాట్లు చేయాలని కోరతామని ఆయన చెప్పారు. తెలంగాణ రాష్ట్ర ఏర్పాటుకు సహకరించే పార్టీలతోనే తాము కలిసి ఉంటామని ఆయన చెప్పారు.