కాంగ్రెసుతో దోస్తీకి కెసిఆర్ నో

న్యూఢిల్లీ: కాంగ్రెసుతో వెళ్లే ఉద్దేశం తమకు లేదని తెలంగాణ రాష్ట్ర సమితి (తెరాస) అధ్యక్షుడు కె.చంద్రశేఖర రావు స్పష్టం చేశారు. హైదరాబాదు బయలుదేరే ముందు ఆయన శుక్రవారం న్యూఢిల్లీలో మీడియా ప్రతినిధులతో మాట్లాడారు. యుపిఎ నాయకులు మీతో సంప్రదింపులు జరుపుతున్నారా అని అడిగితే ఇది సంప్రదింపులకు సంబంధించిన అంశం కాదని, తెలంగాణ రాష్ట్ర సాధనే తమ ధ్యేయమని, అందుకు అనుగుణంగా తాము వ్యవహరిస్తామని ఆయన సమాధానమిచ్చారు.

తాము అధికారంలోకి వచ్చిన వంద రోజుల్లో తెలంగాణ ఇస్తామని బిజెపియే కాకుండా ఎన్డీయె కూడా చెప్పిందని, అందువల్ల తెలంగాణ సాధన కోసం ఎన్డీయె వెంట తాము ఉంటామని ఆయన చెప్పారు. ఎన్డీయెకు 300కు పైగా స్థానాలు వస్తాయని, ఎన్డీయె అధికారంలోకి రావడం ఖాయమని ఆయన జోస్యం చెప్పారు.