ప్రత్యేక ప్రతిపత్తితో నితీష్ కు గాలం?

న్యూఢిల్లీ: బీహార్ కు ప్రత్యేక ప్రతిపత్తి ఇచ్చే పార్టీకి తాము కేంద్రంలో మద్దతు ఇస్తామని నితీష్ కుమార్ చెప్పారు. గత కొద్ది రోజులుగా నితీష్ కుమార్ ను దువ్వడానికి ప్రయత్నిస్తున్న కాంగ్రెసుకు ఒక ఆధారం దొరికినట్లయింది. ఒక గ్రంథావిష్కరణ సభలో శుక్రవారం నితీష్ కుమార్ ఆ ప్రకటన చేయగానే కాంగ్రెసు నేతలు ఏ మాత్రం ఆలస్యం చేయకుండా ప్రతిస్పందించింది. తాము ప్రత్యేక ప్రతిపత్తి ఇవ్వడానికి సిద్ధంగా ఉన్నామని, అయితే ప్రత్యేక ప్రతిపత్తి అంటే ఏమిటో నితీష్ కుమార్ నిర్వచించాలని కాంగ్రెసు సీనియర్ నాయకుడు దిగ్విజయ్ సింగ్ అన్నారు.

బీహార్ కు ప్రత్యేక ప్రతిపత్తి ఇవ్వడానికి గతంలో ప్రధాని మన్మోహన్ సింగ్ నిరాకరించారని, ప్రధానితో ఇంకా చర్చలు జరుగుతున్నాయని నితీష్ కుమార్ చెప్పారు. ప్రధాని పదవికి నితీష్ కుమార్ పేరుపై ఏకాభిప్రాయం రావచ్చుననే ఊహాగానాలు కూడా చెలరేగుతున్నాయి. లౌకిక నాయకుడిని ప్రధానిని చేయాలనే వైఖరితో తృతీయ ఫ్రంట్ నాయకులు ఆయనను సమర్థించవచ్చునని అంటున్నారు. అదే సమయంలో ఆయన ఎన్డీయె ప్రధాని అభ్యర్థిగా ముందుకు రావచ్చునని చెబుతున్నారు.