చిరుతో జైపాల్ రెడ్డి సంప్రదింపులు

హైదరాబాద్: ప్రజారాజ్యం పార్టీ అధ్యక్షుడు చిరంజీవితో కేంద్ర మంత్రి, సీనియర్ కాంగ్రెసు నాయకుడు ఎస్ జైపాల్ రెడ్డి సంప్రదింపులు జరుపుతున్నారు. ప్రజారాజ్యం, తెలంగాణ రాష్ట్ర సమితి (తెరాస) పార్టీలను దువ్వేందుకు కాంగ్రెసు అధిష్ఠానం ప్రయత్నాలు జరుపుతోంది. చిరంజీవితో సంప్రదింపులు జరిపే బాధ్యతను కాంగ్రెసు అధిష్ఠానం జైపాల్ రెడ్డికి అప్పగించింది. ప్రజారాజ్యం పార్టీ ప్రధాన కార్యదర్శి అల్లు అరవింద్ తో జైపాల్ రెడ్డి మాట్లాడుతున్నట్లు సమాచారం.

కాగా, తెరాస అధ్యక్షుడు కె.చంద్రశేఖరరావుతో సంప్రదింపులు జరిపే బాధ్యతను కాంగ్రెసు అధిష్ఠానం గులాం నబీ ఆజాద్ కు అప్పగించింది. 2004 ఎన్నికల సమయంలో గులాం నబీ ఆజాద్ రాష్ట్ర కాంగ్రెసు వ్యవహారాల ఇంచార్జీగా ఉన్నారు. ఆ ఎన్నికల్లో కాంగ్రెసు తెరాసతో పొత్తు పెట్టుకున్న విషయం తెలిసిందే. ఆ సమయంలో చంద్రశేఖరరావుతో ఆజాద్ కు సన్నిహిత సంబంధాలు ఏర్పడ్డాయి. ఈ దృష్ట్యా తెరాసతో మాట్లాడే బాధ్యతను కాంగ్రెసు అధిష్ఠానం ఆజాద్ కు అప్పగించింది.