చిరుతో పవార్ చర్చలు: అమర్

న్యూఢిల్లీ: ప్రజారాజ్యం పార్టీ నేత చిరంజీవితో తాము ఈ నెల 18వ తేదీన సమావేశమవుతామని సమాజ్ వాదీ పార్టీ నాయకుడు అమర్ సింగ్ చెప్పారు. ఎన్సీపి నేత శరద్ పవార్, తాము చిరంజీవితో మాట్లాడుతున్నట్లు ఆయన తెలిపారు. నాలుగో ఫ్రంట్ వైఖరిని చిరంజీవితో చర్చించి ఖరారు చేసుకుంటామని ఆయన శుక్రవారం మీడియా ప్రతినిధులతో చెప్పారు.

తనకు ఫోన్ చేసి కాంగ్రెసు నాయకుడు దిగ్విజయ్ సారీ చెప్పారని, అయితే తమకు కాంగ్రెసుపై పూర్తి నమ్మకం లేదని ఆయన అన్నారు. బిజెపితో తాము ఎన్నికల అనంతరం పొత్తు పెట్టుకునే అవకాశం లేదని ఆయన చెప్పారు. తాము కేంద్రంలో లౌకిక ప్రభుత్వ ఏర్పాటుకు కృషి చేస్తామని ఆయన చెప్పారు.