బాబు కోసం వెంకయ్య, కెసిఆర్

హైదరాబాద్: తెలుగుదేశం పార్టీ అధ్యక్షుడు నారా చంద్రబాబు నాయుడిని ఎన్డీయెలోకి లాగడానికి ప్రయత్నాలు ముమ్మరంగా మారాయి. చంద్రబాబుతో సీనియర్ బిజెపి నాయకుడు ఎం. వెంకయ్యనాయుడు ఫోన్ లో మంతనాలు జరిపినట్లు వార్తలు వస్తున్నాయి. అయితే ఈ వార్తలను తెలుగుదేశం పార్టీ ధృవీకరించడం లేదు. వెంకయ్యనాయుడు చంద్రబాబుతో మంతనాలు జరపలేదని తెలుగుదేశం పార్టీ నాయకుడు కంభంపాటి రామ్మోహన్ రావు చెబుతున్నారు. ఫలితాల వెల్లడి తర్వాత కచ్చితంగా తృతీయ కూటమితో ఉంటామని మాత్రం తెలుగుదేశం నాయకులు చెప్పలేకపోతున్నారు. వామపక్షాల వైఖరిని బట్టి తాము నిర్ణయం తీసుకోవాలనే ఉద్దేశంతో చంద్రబాబు ఉన్నట్లు తెలుస్తోంది. వామపక్షాలు కాంగ్రెసు వైపు మొగ్గు చూపితే చంద్రబాబు ఎన్డీయెలోకి రావచ్చుననే ప్రచారం జరుగుతోంది.

కాగా, చంద్రబాబును ఎన్డీయెలోకి తీసుకురావడానికి తమ పార్టీ అధ్యక్షుడు కె.చంద్రశేఖరరావు ప్రయత్నాలు చేస్తారని, ఈ విషయంపై కెసిఆర్ చంద్రబాబుతో మాట్లాడుతారని తెలంగాణ రాష్ట్ర సమితి (తెరాస) నాయకుడు నాయని నర్సింహా రెడ్డి అన్నారు. తాము మరిన్ని పార్టీలను ఎన్డీయేలోకి తెస్తామని చంద్రశేఖరరావు ఇంతకు ముందు చెప్పిన విషయం తెలిసిందే. చంద్రబాబును ఎన్డీయెలోకి తెస్తారా అని అడిగితే చంద్రశేఖరరావు సమాధానం చెప్పలేదు. దీన్ని బట్టి చంద్రబాబును ఎన్డీయేలోకి తేవడానికి ప్రయత్నాలు ముమ్మరంగానే సాగుతున్నాయని చెప్పవచ్చు.