బెంగాల్ సిఎం బుద్ధదేవ్ రాజీనామా?

న్యూఢిల్లీ: పశ్చిమ బెంగాల్ లో పార్టీ ఘోర వైఫల్యానికి బాధ్యత వహిస్తూ ముఖ్యమంత్రి పదవికి బుద్ధదేవ్ భట్టాచార్య రాజీనామా చేయవచ్చుననే వార్తలు వెలువడుతున్నాయి. గతంలో ఎప్పుడూ లేని విధంగా పశ్చిమ బెంగాల్ లో వామపక్షాలకు ఎదురు దెబ్బ తగిలింది. కాంగ్రెసు, తృణమూల్ కాంగ్రెసు కూటమి వామపక్షాలను దెబ్బ తీశాయి. ఈ నేపథ్యంలో బుద్దదేవ్ భట్టాచార్య రాజీనామా చేస్తారని ప్రచారం జరుగుతోంది. అయితే బుద్ధదేవ్ నిర్ణయాన్ని సిపిఎం ప్రధాన కార్యదర్శి ప్రకాష్ కారత్ వ్యతిరేకిస్తున్నట్లు సమాచారం.

సోమవారం జరిగే పార్టీ పోలిట్ బ్యూరో సమావేశానికి కూడా బుద్ధదేవ్ భట్టాచార్య హాజరు కాకపోవచ్చునని అంటున్నారు. తమ నేతలపై సీనియర్ సిపిఎం నాయకుడు జ్యోతిబసు తీవ్రంగా మండిపతున్నట్లు చెబుతున్నారు. పార్టీని చేజేతులా నాశనం చేశారని ఆయన ఆగ్రహం వ్యక్తం చేస్తున్నట్లు తెలుస్తోంది. సిపిఎం నాయకత్వంపై తిరుగుబాటు చేసి సోమనాథ్ ఛటర్జీ ఉద్వాసనకు గురైన విషయం తెలిసిందే. ఈ స్థితిలో సిపిఎం భవిష్యత్తు ప్రశ్నార్థకంగా మారింది.