కారత్ రాజీనామా చేయరు: సిపిఎం

న్యూఢిల్లీ: లోకసభ ఎన్నికల్లో ఘోర వైఫల్యానికి ప్రధాన కార్యదర్శి ప్రకాష్ కారత్ ను, పశ్చిమ బెంగాల్ ముఖ్యమంత్రి బుద్ధదేవ్ భట్టాచార్యను సిపిఎం నిందించడానికి నిరాకరించింది. 1964 తర్వాత సిపిఎం ఇంత ఘోర వైఫల్యాన్ని చవి చూడడం ఇదే మొదటిసారి. ఎన్నికల ఫలితాలపై సమీక్షించడానికి సిపిఎం పోలిట్ బ్యూరో సమావేశం సోమవారంనాడు జరిగింది. సీనియర్ నేతలు కారత్ పై కత్తులు నూరవచ్చుననే వార్తలు వచ్చాయి. అందుకు భిన్నంగా సమావేశం జరిగింది. ప్రకాష్ కారత్ పార్టీ ప్రధాన కార్యదర్శి పదవి నుంచి తప్పుకోరని కూడా సిపిఎం పోలిట్ బ్యూరో సీనియర్ సభ్యులు నిరుపమ్ సేన్, మాణిక్ సర్కార్ ప్రకటించారు.

బుద్ధదేవ్ భట్టాచార్య ముఖ్యమంత్రి పదవికి రాజీనామా చేస్తారని వచ్చిన వార్తల్లో నిజం లేదని సేన్ చెప్పారు. ప్రజలు పారిశ్రామికీకరణను వ్యతిరేకించారని తాను అనుకోవడం లేదని ఆయన ఒక ప్రశ్నకు సమాధానంగా చెప్పారు. ఎన్నికల అనంతరం శాంతిభద్రతల పరిస్థితిని చక్కదిద్డడంలో మునిగిపోయినందననే బుద్ధదేవ్ భట్టాచార్య సమావేశానికి రాలేదని వామపక్ష కూటమి చైర్మన్ బిమన్ బోస్ చెప్పారు. ఆ విషయాన్ని బుద్ధదేవ్ పార్టీకి తెలియజేశారని ఆనయ చెప్పారు.