సిపిపి నేతగా మన్మోహన్ ఎన్నిక

న్యూఢిల్లీ: మన్మోహన్ సింగ్ ను కాంగ్రెస్ పార్టీ మంగళవారంనాడు తమ పార్లమెంటరీ పార్టీ (సిపిపి) నేతగా ఎన్నుకుంది. దీంతో రెండో సారి మన్మోహన్ సింగ్ ప్రధాని కావడానికి కాంగ్రెస్ పార్టీ లాంఛనం పూర్తి చేసింది. తమ చైర్ పర్సన్ గా సోనియా గాంధీని కాంగ్రెస్ పార్లమెంటరీ పార్టీ (సిపిపి) ఎన్నుకుంది. ప్రధాని పదవికి మన్మోహన్ సింగ్ సోమవారం రాజీనామా చేసిన విషయం తెలిసిందే.

మన్మోహన్ సింగ్ మంత్రి వర్గ సిఫార్సు మేరకు రాష్ట్రపతి ప్రతిభా పాటిల్ 14వ లోకసభ రద్దు చేసింది. తదుపరి ఏర్పాట్లు జరిగే వరకు ఆపద్ధర్మ ప్రధానిగా కొనసాగాలని ప్రతిభా పాటిల్ మన్మోహన్ సింగ్ ను కోరింది. నేషనల్ కాన్ఫరెన్స్, జెడి (ఎస్), బిఎస్పీలు తమ మద్దతు ప్రకటించడంతో మన్మోహన్ సింగ్ ప్రభుత్వ ఏర్పాటుకు ప్రతిభా పాటిల్ ఆహ్వానించడానికి అడ్డంకులు తొలిగిపోయినట్లు భావించవచ్చు.