25న వైయస్ మంత్రి వర్గం

హైదరాబాద్: ముఖ్యమంత్రిగా ప్రమాణంచేసిన వైఎస్‌ రాజశేఖరరెడ్డి ఈ నెల 25వ తేదీన మంత్రివర్గాన్ని ఏర్పాటు చేసే అవకాశం ఉంది. బుధవారం ఆయన ఒక్కరే ప్రమాణ స్వీకారం చేశారు. ఇక మంత్రి వర్గ కూర్పుపై ఆయన దృష్టి పెట్టనున్నారు. మంత్రి వర్గ ఏర్పాటుకు సంబంధించి ఇప్పటికే ఆయన ప్రాథమిక కసరత్తు పూర్తిచేశారు. వైయస్ మొదటి సారి 30 - 35 మంది మంత్రులను తీసుకునే అవకాశం ఉంది. కేంద్ర ప్రభుత్వ ప్రమాణస్వీకార కార్యక్రమంలో పాల్గొనేందుకు గురువారం రాత్రి ఢిల్లీ వెళ్తున్నారు. 22న ప్రధానిగా మన్మోహన్‌ సింగ్‌ ప్రమాణంచేశాక ఆయన్ను వైఎస్‌ కలుస్తారు. అదేరోజు సోనియా గాంధీతో భేటీ అయి రాష్ట్ర మంత్రివర్గ ఏర్పాటుపై చర్చించాలని భావిస్తున్నారు.

తాను రూపొందించుకున్న జాబితాను సోనియా ముందుంచాలని వైయస్ భావిస్తున్నారు. 22న కేంద్రమంత్రివర్గం ఏర్పాటు కూడా ఉండడంతో ఆరోజు సోనియా అప్పాయింట్‌ మెంట్‌ పై సందేహాలున్నాయి. ఆ రోజు సోనియాతో భేటీ కుదిరితే అదే రోజు జాబితాకు ఆమోదముద్ర లభిస్తుంది. ఆ తరువాతి రోజు అంటే 23న తన తండ్రి రాజారెడ్డి వర్ధంతి కార్యక్రమంలో పాల్గొనేందుకు వైఎస్‌ పులివెందుల వెళ్తారు. 25వ తేదీన మంత్రి వర్గ ప్రమాణ స్వీకారాన్ని పెట్టుకుంటారని అంటున్నారు. మంచి ముహూర్తాలను బట్టి తేదీ మారినా మారవచ్చు. అయితే వైఎస్‌ 27 ఉదయం హైదరాబాద్‌ నుంచి బయలుదేరి ప్రత్యేక విమానంలో జెరూసలేం వెళ్తున్నారు. తిరిగి 29 రాత్రికి హైదరాబాద్‌ చేరుకుంటారు. కాబట్టి ఎట్టి పరిస్థితుల్లో 26లోగానే మంత్రివర్గం ఏర్పాటు జరిగి తీరుతుంది.