ఎన్‌కౌంటర్‌లో పటేల్‌ సుధాకర్‌ మృతి

వరంగల్‌: మావోయిస్టు కేంద్ర కమిటీ సభ్యుడు పటేల్‌ సుధాకరరెడ్డి పోలీసులతో జరిగిన ఎన్‌కౌంటర్‌లో మృతి చెందాడు.వరంగల్‌ జిల్లా తాడ్వాయి మండలం లవ్వాల అడవుల్లో ఈ ఉదయం జరిగిన ఎన్‌కౌంటర్‌లో సుధాకర్‌రెడ్డి, అతనితో పాటు జిలాల కమిటీ సభ్యుడు డీసీఎం వెంకటయ్య కూడా మృతి చెందాడు. సుధాకర్‌రెడ్డి 2003లో అప్పటి ముఖ్యమంత్రి చంద్రబాబునాయుడుపై అలిపిరి వద్ద జరిపిన మావోయిస్టు దాడిలో ప్రధాన నిందితుడు.
దివంగత మాజీ హోంమంత్రి మాధవరెడ్డితో పాటు ఐపీఎస్‌ అధికారి ఉమేష్‌చంద్ర హత్య కేసుల్లో కూడా ప్రధాన నిందితుడుగా ఉన్నాడు. సుధాకర్‌రెడ్డి మహబూబ్‌నగర్‌ జిల్లా గద్వాల ప్రాంతం మల్దకల్‌ మండలం కడ్తిరావుల చెరుకు చెందినవాడు. సుధాకర్‌పై రూ.12 లక్షల రివార్డు కూడా ఉంది. ప్రస్తుతం మహారాష్ట్ర బాధ్యతలు నిర్వహిస్తున్నాడు.

పటేల్‌ సుధాకర్‌రెడ్డి చనిపోవడంతో ఆయన స్వగ్రామం కుర్తిరావుల చెరువులో విషాదచాయలు అలుముకున్నాయి. టీవీలో చూడటం ద్వారానే తమకు విషయం తెలిసిందని గ్రామస్తులు అంటున్నారు. గతంలో ఎన్నో సార్లు పోలీసులకు చిక్కినట్లే చిక్కి తప్పించుకోవడంలో సుధాకర్‌ దిట్ట అని... అయితే పోలీసులు జరిపిన ఎన్‌కౌంటర్‌పై వారు అనుమానం వ్యక్తం చేశారు. సుధాకర్‌రెడ్డికి భార్యతో పాటు ఓ కుమారుడు ఉన్నాడు. భార్య గతంలో దళంలో పనిచేసి అనారోగ్యం కారణంగా ఆరేళ్ల క్రితం లొంగిపోయారు.

కుమారుడు శేషారెడ్డి హైదరాబాద్‌లో ఇంజనీరింగ్‌ చదువుతున్నాడు. ఉస్మానియా యూనివర్సీటిలో ఎంఏ చేస్తున్న సమయంలో 1981లో దళంలో చేరి గత 25 ఏళ్లుగా అజ్ఞాతంలోకి వెళ్లారు. రెండేళ్ల క్రితం రాష్ట్రాని వదిలి వెళ్లిన సుధాకర్‌ కొన్ని రోజులు జార్ఖండ్‌ రాష్ట్ర బాధ్యతలు నిర్వహించారు. మావోయిస్టు ఇంటలిజెన్స్‌ చీఫ్‌గా ఉన్న ఆయన కొంత కాలం క్రితమే మహారాష్టక్రు వచ్చాడు. నాలుగు రోజుల క్రితం మహారాష్టల్రో పట్టుకొని ఇక్కడికి తీసుకొచ్చి సుధాకర్‌రెడ్డిని పోలీసులు ఎన్‌కౌంటర్‌ చేశారని ఆయన సోదరుడు ప్రభాకర్‌రెడ్డి ఆరోపిస్తున్నాడు.