అరవింద్ రాజీనామా చేయాలి

హైదరాబాద్‌: అల్లు అరవింద్‌ రాజీనామా చేస్తే మంచిదన్న భావనను పీఆర్పీ సీనియర్‌ నేత తోట చంద్రశేఖర్‌ వ్యక్తంచేసినట్టు సమాచారం. దీనిపై చిరంజీవి జోక్యం చేసుకుని.. "పార్టీకి జరిగిన నష్టానికి అందరం సమష్ఠిబాధ్యత వహిద్దామని నిర్ణయించుకున్నాం కదా! మళ్లీ ఇలా మాట్లాడటం అనవసరం''- అని వారించినట్టు సమాచారం. శనివారం నాటి పీఏసీ సమావేశంలో 'అల్లు' రాజీనామా వ్యవహారం గరంగరంగా సాగినట్టు సమాచారం. "టికెట్లు అమ్ముకున్నారన్న ప్రచారం అబద్ధమే అయి ఉండొచ్చు. కానీ, అది ప్రజల్లో విస్తృత ప్రచారంలో ఉంది. జనం దాన్ని నిజమని నమ్ముతున్నారు. ఆ మచ్చ పోవాలంటే ఎవరో ఒకరు బాధ్యత వహించాలి. లేకపోతే పార్టీ ప్రతిష్ఠ దిగజారుతుంది. రేపు స్థానిక సంస్థల ఎన్నికలకు ఏ మొఖం పెట్టుకుని ప్రజల్లోకి వెళతాం'' అని తోట చంద్రశేఖర్‌ పీఏసీ సమావేశంలో గట్టిగా వాదించినట్టు తెలుస్తోంది.పరోక్షంగా అల్లు అరవింద్‌ రాజీనామా చేస్తే మంచిదన్న భావనను ఆయన వ్యక్తంచేసినట్టు సమాచారం.

అదే సమయంలో కేవీ రావు మాట్లాడుతూ... "రాజుగారి భార్య పతివ్రత అయితే సరిపోదు, పతివ్రతలా కనిపించాలి'' అన్నట్టు తెలిసింది. పైస్థాయిలో డబ్బులు చేతులు మారకపోయినా ద్వితీయశ్రేణి నేతలు వసూలు చేశారన్న వాదన వినిపించినట్టు తెలిసింది. మరోవైపు తాను రెండు స్థానాల నుంచి పోటీచేసి ఉండాల్సింది కాదని సీనియర్‌ నేత దేవేందర్‌గౌడ్‌ అభిప్రాయపడినట్టు తెలిసింది.

పూర్తిస్థాయిలో పార్టీకోసం పని చేయలేకపోయానన్న భావననూ ఆయన వ్యక్తం చేసినట్టు తెలిసింది. అలాగే "ఎన్టీఆర్‌ దగ్గర పనిచేశాను. అలాగే మీవద్ద చేశాను. మిమ్మల్ని ముఖ్యమంత్రిగా చూడాలనుకున్నా... నా కోరిక తీరలేదు. భవిష్యత్‌లో మీరు కచ్చితంగా సీఎం అవుతారు. నేను డయాలసిస్‌ పేషెంట్‌ని. బహుశా వచ్చేసారికి ఉంటానో లేదో. అడ్వాన్స్‌ కంగ్రాచ్యులేషన్స్‌'' అని పీఆర్పీ సీనియర్‌ నేత ఉపేంద్ర చేసిన వ్యాఖ్యలు పీఏసీ సమావేశంలో ఒకింత ఉద్విగ్నతను సృష్టించినట్టు తెలిసింది.ఉపేంద్ర చేసిన వ్యాఖ్యలకు చిరంజీవి చలించిపోయారు. అప్పుడు మొదటి బొకే మీ నుంచే అందుకుంటానని ఆయనతో అన్నట్లు తెలిసింది.

ఇక చిరంజీవి మాత్రం 'గెలిచి ఉంటే అన్నీ నేర్చుకోవడానికి అవకాశముండేది కాదు. ఓడిపోవడం కూడా ఒక విధంగా అదృష్టమే. అన్ని విషయాలూ తెలుసుకోవడానికి అవకాశమిచ్చింది. రాజకీయాలపై పట్టుసాధిస్తాను' అని పార్టీ అధినేత చిరంజీవి అనడం గమనార్హం. దీనిపై కమిటీ సభ్యులంతా చప్పట్లు కొట్టి అభినందించినట్లు సమాచారం. కాపు వర్గాన్ని పార్టీ దూరంగా ఉంచటం నష్టపరిచిందని, వారిలో అపనమ్మకాన్ని పెంచిందని మరో నేత వేదవ్యాస్‌ అన్నట్లు సమాచారం. ఇతర వర్గాలు కూడా మద్దతివ్వలేదని, ఈవీఎంల్లో ఏదైనా మతలబు ఉందేమో పార్టీ దృష్టి కేంద్రీకరించాలని కూడా ఆయన సూచించినట్లు తెలిసింది. చివరిగా.. పార్టీని అన్నివిధాలుగా పునర్వ్యవస్థీకరించే అధికారాన్ని సమావేశం చిరంజీవికి కట్టబెట్టింది.