ఐశ్వర్యకు షారూఖ్ క్షమాపణ

ముంబయి: బాలీవుడ్ నటి ఐశ్వర్యా రాయ్ కి ఇటీవల బాలీవుడ్ బాద్షా షారూక్ ఖాన్ క్షమాపణలు చెప్పారు. దాన్ని ఐశ్యర్య అంగీకరించారు. దాంతో బచ్చన్, షారూక్ కుటుంబాల మధ్య నెలకొన్న విభేదాలు సమసిపోయినట్లు భావిస్తున్నారు. కరణ్ జోహర్స్ జన్మ దిన వేడుకల్లో ఈ సంఘటన జరిగింది.కొద్ది నిమిషాలు షారూక్ ఐశ్వర్యతో మాట్లాడాడు. తాను కొన్ని విషయాల్లో తప్పు చేసి ఉంటానని, అందుకు క్షమించాలని షారూక్ ఐశ్వర్యతో అన్నారు. ఆ తర్వాత కొద్ది సేపటికి అభిషేక్ బచ్చన్, ఐశ్వర్యా రాయ్ జంట, షారూక్, ఆయన భార్య గౌరి జంట కలిసి నృత్యం చేశారు. నవ్వుతూ పలకరించుకున్నారు.

అభిషేక్, ఐశ్వర్యలను షారూక్ భార్య గౌరి తన ఇంటికి ఆహ్వానించారు. దాంతో వారు షారూక్ ఇంటికి చేరుకున్నారు. రితిక్ - సుషేన్ రోషన్, కరీనా కపూర్ - సైఫ్ అలీ ఖాన్, కజాల్ ఆనంద్ - అర్జున్ రాంపాల్ తదితర జంటలు కూడా షారూక్ ఇంటికి వెళ్లి మర్నాడు ఉదయం ఆరు గంటల వరకు అక్కడే ఉన్నారు. షారూక్ ఖాన్ నిర్మించిన చల్తే చల్తే సినిమా నుంచి ఐశ్వర్యా రాయ్ తప్పించడంతో ఇరు కుటుంబాల మధ్య గొడవలు ప్రారంభమైంది. తమ పెళ్లికి కూడా అభిషేక్, ఐశ్వర్య షారూక్ దంపతులను ఆహ్వానించలేదు. షారూక్ ఐశ్వర్యపై ఏదో వ్యాఖ్య చేశాడని సల్మాన్ చెప్పడం అగ్నికి ఆజ్యం పోసినట్లయింది. దీనిపై తాను ఆ విధంగా ఐశ్వర్యను అనలేదని షారూక్ ఎస్పీ నేత అమర్ సింగ్ ను కలిసి వివరణ కూడా ఇచ్చుకున్నాడు. కానీ ఇరు కుటుంబాల మధ్య సయోధ్య సాధ్యం కాలేదు.