రాష్ట్రపతి ప్రసంగానికి క్యాబినెట్ ఆమోదం

న్యూఢిల్లీ: పార్లమెంటు ఉభయ సభలను ఉద్దేశించి రాష్ట్రపతి చేసే ప్రసంగ పాఠానికి కేంద్ర మంత్రి వర్గం తుది రూపు ఇచ్చింది. ప్రధాని డాక్టర్ మన్మోహన్ సింగ్ అధ్యక్షుతన కేంద్ర మంత్రి వర్గం తొలిసారి శనివారం సమావేశమైంది. లోకసభ సమావేశాలు సోమవారం ప్రారంభమవుతున్నాయి. కొత్తగా ఎన్నికైన సభ్యులు ఆ రోజు ప్రమాణ స్వీకారం చేస్తారు. స్పీకర్ ఎన్నిక జూన్ 3వ తేదీన జరుగుతుంది. ఆ తర్వాతి రోజు రాష్ట్రపతి ప్రతిభా పాటిల్ ఉభయ సభలను ఉద్దేశించి ప్రసంగిస్తారు.

ప్రభుత్వ కార్యక్రమాలను, విధానాలను రాష్ట్రపతి ప్రసంగం అద్దం పట్టనుంది. ప్రధాని మన్మోహన్ సింగ్ ఇప్పటికే ప్రభుత్వ వంద రోజుల కార్యాచరణపై హామీ ఇచ్చారు. యుపిఎ పూర్తి చేయకుండా మిగిలిన కార్యక్రమాలపై కొత్త ప్రభుత్వం దృష్టి పెడుతుంది. ప్రపంచ ఆర్థిక మాంద్యం దృష్ట్యా కొత్త ప్యాకేజీని ప్రకటించే అవకాశం కూడా ఉంది. రాష్ట్రపతి ప్రసంగంపై జూన్ 5,8,9 తేదీల్లో చర్చ జరుగుతుంది.