కెసిఆర్ పై నారాయణ శివాలు

కరీంనగర్‌: తెలంగాణ రాష్ట్ర సమితి (తెరాస) అధ్యక్షుడు కె.చంద్రశేఖర రావుపై సిపిఐ రాష్ట్ర కార్యదర్శి కె.నారాయణ విరుచుకుపడ్డారు. కెసిఆర్ స్వయంకృతాపరాధం వల్లనే తెరాస ఓటమి పాలైందని ఆయన శనివారం మీడియా ప్రతినిధుల సమావేశంలో అన్నారు. పాలు తాగే పసి పిల్లవాడు కూడా కెసిఆర్ లాగా వ్యవహరించబోరని ఆయన వ్యాఖ్యానించారు. కెసిఆర్ పొత్తు ధర్మాన్ని విస్మరించారని ఆయన విమర్శించారు.

పోలింగ్ జరిగి ఫలితాలు వెలువడక ముందే పొత్తు ధర్మాన్ని విస్మరించి ఎన్డీయెతో కలుస్తున్నట్లు చెప్పారని, కాబోయే ప్రధాని అద్వానీయేనని, ఎన్డీయె గెలుస్తుందని చెప్పారని ఆయన గుర్తు చేశారు. తన వ్యవహార శైలి వల్ల కెసిఆర్ నైతికంగా దెబ్బ తిన్నారని ఆయన అన్నారు. కెసిఆర్ అన్నీ పొరపాట్లే చేశారని ఆయన అన్నారు.