మోహన్ రెడ్డి ఆకస్మిక రాజీనామా

హైదరాబాద్‌: రాష్ట్ర అడ్వకేట్‌ జనరల్‌ సీవీ మోహన్‌ రెడ్డి తన పదవికి ఆకస్మికంగా రాజీనామా చేశారు. ఆదివారం సాయంత్రం ముఖ్యమంత్రి వైఎస్‌ రాజశేఖరరెడ్డికి ఆయన తన రాజీనామా లేఖను అందజేశారు. మోహన్‌ రెడ్డి పనితీరుపై తీవ్ర అసంతృప్తితో ఉన్న ముఖ్యమంత్రి ఆయన్ను తొలగించాలని నిర్ణయం తీసుకొని సాయంత్రం ఐదు గంటలకు తన ఇంటికి పిలిపించి రాజీనామాకు ఆదేశించారని, దీంతో అక్కడికక్కడే ఆయన ఈ మేరకు లేఖ రాసి ఇచ్చారని సమాచారం. మోహన్‌ రెడ్డి రాజీనామాను వైఎస్‌ వెంటనే ఆమోదించారు. ఆదివారం సాయంత్రం దాకా తన సహచరులతో కలసి సోమవారం విధుల కేటాయింపు విషయమై మోహన్‌ రెడ్డి చర్చించారు. ఇంతలోనే ముఖ్యమంత్రి కార్యాలయం నుంచి ఏజీకి ఫోన్‌ వచ్చింది.

అంతకుముందు అడ్వకేట్‌ జనరల్‌ ముఖ్యమంత్రిని కలిసేందుకు సమయం కోరినా ఆయన ఇవ్వలేదని తెలిసింది. ఒకటి రెండు రోజుల్లో కొత్త అడ్వకేట్‌ జనరల్‌ ను నియమించే అవకాశం ఉంది. ఈ పదవికి సీనియర్‌ న్యాయవాదులు ఎస్‌.ఎస్‌.ప్రసాద్‌, ఎస్‌.ఆర్‌.అశోక్‌ పేర్లు ప్రముఖంగా వినిపిస్తున్నాయి. ఈ నియామకంతోపాటు ప్రభుత్వ న్యాయవాదుల వ్యవస్థలోనూ భారీగా మార్పులు జరిగే అవకాశముందని సమాచారం.