లోకసభ ఉప సభాపతిగా ముండా

న్యూఢిల్లీ: లోకసభ ఉప సభాపతిగా బిజెపి నాయకుడు కరియా ముండా ఎన్నికయ్యారు. ఉప సభాపతిగా కరియా ముండాను సభ మూజువాణీ ఓటుతో ఎన్నుకుంది. కుంటి లోకసభ సభ్యుడు ముండాకు యుపిఎ నుంచి, ప్రతిపక్షాల నుంచి పూర్తి మద్దతు లభించింది. ముండా తరఫున కాంగ్రెస్ నేతృత్వంలోని యుపిఎ, ఎన్డీయె శుక్రవారంనాడు 13 సెట్ల నామినేషన్ పత్రాలను దాఖలు చేశాయి.

సంప్రదాయాన్ని పాటించే ఉద్దేశంతో ఉప సభాపతి పదవిని యుపిఎ ప్రభుత్వం ప్రతిపక్షాలకు ఇవ్వడానికి ముందుకు వచ్చింది. దీంతో బిజెపి ఉప సభాపతి పదవికి కరియా ముండా పేరును ఖరారు చేసింది. గిరిజన నాయకుడైన ముండా జార్ఖండ్ నుంచి ఆరుసార్లు లోకసభకు ఎన్నికయ్యారు. వాజ్ పేయి ప్రభుత్వంలో ఆయన మంత్రిగా కూడా పని చేశారు. 1936లో ఇప్పటి జార్ఖండ్ రాజధాని అయిన అప్పటి బీహారు రాష్ట్రంలోని రాంచీలో జన్మించిన ఆయన పోస్టు గ్రాడ్యుయేషన్ లో పట్టా తీసుకున్నారు.