ఈనాడు చంద్రబాబు బాకా: వైయస్

హైదరాబాద్‌: ఈనాడు, ఆంధ్రజ్యోతి దినపత్రికలు తెలుగుదేశం పార్టీ అధ్యక్షుడు నారా చంద్రబాబు నాయుడికి కొమ్ము కాస్తున్నాయని ముఖ్యమంత్రి డాక్టర్ వైయస్ రాజశేఖర రెడ్డి అన్నారు. గవర్నర్ ప్రసంగంపై శాససనభలో జరిగిన చర్చకు ఆయన బుధవారం సమాధానమిచ్చారు. చంద్రబాబుకు మంచి మీడియా మద్దతు ఉందని, అత్యధిక సర్క్యులేషన్ గల రెండు పత్రికలు చంద్రబాబుకు సంబంధించినవేనని, ఈనాడు ఆంధ్రజ్యోతి పత్రికలు అన్ని రకాలుగా చంద్రబాబుకు ఊతం ఇస్తున్నాయని ఆయన అన్నారు.

ఆ పత్రికలు తమ ప్రభుత్వాన్ని ప్రతి విషయంలో తప్పు పడుతూ వచ్చాయని ఆయన అన్నారు. చిన్న లోపాలు జరిగినా, ఒక్కోసారి లోపాలేవీ లేకపోయినా ఆ పత్రికలు భూతద్దంలో చూపిస్తూ వచ్చాయని ఆయన అన్నారు. ఆ పత్రికలు రాసే వార్తలను ప్రజలు ఏదో మేరకు నమ్మే అవకాశం ఉంటుందని, దాని వల్ల కూడా తమకు ఎన్నికల్లో కొన్ని సీట్లు తగ్గాయని, ఊహించిన ఫలితం కాంగ్రెసు సాధించకపోవడానికి ఇది కూడా ఒక కారణమని ఆయన అన్నారు.