బాబుతో దోస్తీ ఉండదు: చిరు

హైదరాబాద్: రాష్ట్రంలో తెలుగుదేశం పార్టీతో పొత్తు ఉండదని ప్రజారాజ్యం పార్టీ అధినేత చిరంజీవి స్పష్టం చేశారు. వచ్చే గ్రేటర్ హైదరాబాదు ఎన్నికల్లో తెలుగుదేశంతో పొత్తు పెట్టుకోవడానికి ప్రజారాజ్యం పార్టీ ప్రయత్నాలు చేస్తోందని వార్తలు వచ్చిన నేపథ్యంలో చిరంజీవి ఆ విషయాన్ని తేల్చేశారు. కాంగ్రెసు, తెలుగుదేశం పార్టీలతో పొత్తు ఉండదని ఆయన చెప్పారు.

చిన్న పార్టీలతోనే తాము పొత్తులకు సిద్ధపడుతామని ఆయన చెప్పారు. అది కూడా భావ సారూప్యత కలిగిన పార్టీలతోనే కలిసి పని చేస్తామని ఆయన అన్నారు. ఈ స్థితిలో లోకసత్తా, సిపిఎం,సిపిఐలతో ప్రజారాజ్యం పార్టీ పొత్తులకు ప్రయత్నించవచ్చునని భావించడానికి వీలవుతోంది. కె.చంద్రశేఖర రావు నేతృత్వంలోని తెలంగాణ రాష్ట్ర సమితి (తెరాస)తో పొత్తు వద్దని పార్టీలో దేవేందర్ గౌడ్ వంటి నాయకులు అంటున్నట్లు సమాచారం.