' ఉద్యమాన్ని కెసీఆర్ బొంద బెట్టిండు'

హైదరాబాద్‌:''కేసీఆర్‌ను నమ్ముకొని ఉద్యమాన్ని అప్పగిస్తే బొందపెట్టిండు"" అని టీఆర్‌ఎస్‌ అసమ్మతి నేతలు నిప్పులు చెరిగారు. టీఆర్‌ఎస్‌ అసమ్మతి నేతల భేటీ అనంతరం సోమాజిగూడ ప్రెస్‌ క్లబ్‌లో విలేకరుల సమావేశంలో మాట్లాడారు. అసమ్మతి నేతలు జిట్టా బాలకృష్ణారెడ్డి, సుహాసిని రెడ్డి తదిరులు మాట్లాడుతూ తెలంగాణ ఉద్యమం కేసీఆర్‌ నిరంకుశత్వం, ఏకపక్ష ధోరణి, కల్లబొల్లి మాటల వల్లే అణగారిపోయిందని విరుచుకుపడ్డారు. ఎన్నికల్లో కేసీఆర్‌ సీట్లు అమ్ముకున్నట్లు ఆరోపించారు.

40 అసెంబ్లీ సీట్లలో పోటీ చేస్తే కేవలం 10 సీట్లు గెలిచామని, అలాగే కేవలం రెండు మాత్రమే పార్లమెంటు సీట్లు గెలిచామని ఈ వైఫల్యాలకు కేసీఆర్‌ బాధ్యత వహించాలని అన్నారు. కేసీఆర్‌ రాజీనామా చేయాలని డిమాండ్‌ చేశారు. మళ్లీ తెలంగాణ ఉద్యమం బలోపేతం కావాలంటే సమష్టి నాయకత్వానికి ఉద్యమాన్ని అప్పగించాలని అన్నారు.