హైటెక్ సిటీకి బాంబు బెదిరింపు

హైదరాబాద్: హైదరాబాదులోని హైటెక్ సిటీకి గురువారం ఉదయం బాంబు బెదిరింపు తీవ్ర కలవరం సృష్టించింది. హైటెక్ సిటీని బాంబులతో పేల్చివేస్తున్నట్లు ఒక గుర్తు తెలియని వ్యక్తి ఒక తెలుగు టీవీ చానెల్ కు ఫోన్ చేసి చెప్పాడు. ఈ విషయాన్ని టీవి చానెల్ ప్రతినిధులు సైబరాబాద్ పోలీసులకు తెలియజేశారు. దీంతో పోలీసులు హైటెక్ సిటీని ఖాళీ చేయించి తనిఖీలు నిర్వహించారు. సైబర్ టవర్స్ వద్ద వాహనాలను విస్తృతంగా తనిఖీలు చేశారు.

బెదిరింపు కాల్ వచ్చిన సెల్ నెంబర్ ను కూడా టీవీ చానెల్ ఇచ్చింది. అదే విధంగా కారులో బాంబులను పెట్టి పేల్చివేస్తున్నట్లు ఆగంతకుడు చెప్పినట్లు ఆ టీవీ చానెల్ తెలిపింది. దీంతో కార్లను పోలీసులు సైబర్ టవర్స్ వద్ద తనిఖీలు చేశారు. అయితే బెదిరింపు కాల్ ఉత్తదేనని పోలీసులు తేల్చారు. దీంతో అందరూ ఊపిరి పీల్చుకున్నారు.