టీఆర్‌ఎస్‌ కి కేసీఆర్‌ రాజీనామా

హైదరాబాదు : తెలంగాణ రాష్ట్ర సమితి అధ్యక్ష పదవికి కల్వకుంట్ల చంద్రశేఖరరావు రాజీనామా చేశారు. ఈ విషయాన్ని పార్టీ ప్రధాన కార్యదర్శి మధుసూదనాచారి మీడియా సమావేశంలో తెలిపారు.ఈ సందర్భంగా మాట్లాడుతూ కేసీఆర్ ..గత తొమ్మిది సంవత్సరాలుగా తెలంగాణ అంశాన్ని అంతర్జాతీయ స్థాయిలో చర్చకు వచ్చేలా కృషి చేశారని పేర్కొన్నారు. రాష్ట్ర రాజకీయాలు పూర్తిగా తెలంగాణ చుట్టూ తిరిగేలా చేయడంలో ఆయన సఫలీకృతులయ్యారని కొనియాడారు. తెరాస ద్వారా పదవులు పొంది సంతృప్తి చెందని కొందరు నాయకులు చేస్తున్న దుష్ప్రచారంతో ఆయన మనస్థాపం చెందారని మధుసూదనాచారి తెలిపారు.

టీఆర్‌ఎస్‌ పార్టీని దెబ్బ తీయడానికి కొందరు కుట్రపన్నారని ఆ పార్టీ అధ్యక్షపదవికి రాజీనామా చేసిన కేసీఆర్‌ అన్నారు. ఎవరు ఎన్ని కుట్రలు పన్నినా ఉద్యమం ఆగదని ఆయన స్ఫష్టం చేశారు. అసమ్మతి నేతల విమర్శలతో కలత చెందానని, తనపెైనా, తన కుటుంబంపెైనా వ్యక్తిగత దాడి చేశారని కేసీఆర్‌ అవేదన వ్యక్తం చేశారు.గత నెల రోజులుగా తన కుటుంబంపెై అభూత కల్పనలు వస్తున్నాయని అందుకు రాజీనామా చేస్తున్నట్లు ఆయన రాజీనామా లేఖలో పేర్కొన్నారు. తన రాజీనామాను అమోదించాలని పార్టీ ప్రధాన కార్యదర్శిని కేసీఆర్‌ కోరినట్లు తెలుస్తోంది.

టీఆర్‌ఎస్‌లో సంక్షోభం ముదిరే అవకాశముందని గమనించిన కేసీఆర్‌ అధ్యక్ష పదవికి కేసీఆర్‌ రాజీనామా చేసినట్లు సమాచారం. ఇక కేసీఆర్‌ రాజీనామా నిర్ణయాన్ని రాష్ట్ర కార్యవర్గ సభ్యులకు సైతం సమాచారం అందించినట్లు మధుసూదనాచారి తెలిపారు. కేసీఆర్‌ హఠాత్తుగా తీసుకున్న రాజీనామా నిర్ణయంపై పార్టీ నేతల్లో కలకలం నెలకొంది. కేసీఆర్‌ అధ్యక్ష పదవికి రాజీనామా చేయడం ఇది రెండో సారి. గత ఏడాది ఉప ఎన్నికల ఫలితాల అనంతరం రాజీనామా చేసి వెనక్కి తీసుకున్నారు.