ఓటమికి నాదే బాధ్యత: రాజ్‌నాథ్‌

న్యూఢిల్లీ: లోక్‌సభ ఎన్నికల్లో పార్టీ పరాజయానికి తనదే బాధ్యతని భారతీయ జనతా పార్టీ (బిజెపి) అధ్యక్షుడు రాజ్‌ నాథ్‌ సింగ్‌ అన్నారు. బిజెపి కార్యవర్గ సమావేశాలు శనివారం ప్రారంభమయ్యాయి. ఈ సందర్భంగా ఎన్నికల్లో పార్టీ వైఫల్యాలపై నేతల్లో ఉన్న అసంతృప్తి, పరస్పరం నిందలు వేసుకోవటం తదితర విషయాలు చర్చకు వచ్చాయి. పార్టీ పరాజయానికి పూర్తి బాధ్యత తనదేనని ఈ సందర్భంగా రాజ్‌ నాథ్‌ ప్రకటించారు. అయినా ఆ విషయాలపై పార్టీలో చర్చించుకోవాలే కాని క్రమశిక్షణ తప్పి వ్యవహరిస్తే సహించమని ఆయన అసమ్మతివాదులను హెచ్చరించారు.

పార్టీ వైఫల్యానికి ఎవరినో ఒకరిని బాధ్యులను చేయడం కూడా సరి కాదని ఆయన అన్నారు. నాయకులు బహిరంగ విమర్శలు చేయడం మంచిది కాదని అన్నారు. ఇదిలాఉండగా పార్టీ నేతలు అరుణ్‌జైట్లీ, యశ్వంత్‌సిన్హా, వసుంధరారాజేలు ఈ సమావేశాలకు హాజరుకాలేదు.పార్టీ నాయకత్వంపై విమర్శలు ఎక్కుపెడుతున్న జస్వంత్ సింగ్, యశ్వంత్ సింగ్ లకు 12 మంది సీనియర్ నాయకుల మద్దతు ఉన్నట్లు తెలుస్తోంది.