చిరుతో కలిసి పని చేస్తాం: రాఘవులు

హైదరాబాద్‌: బేషరతుగా వస్తే చిరంజీవి నాయకత్వంలోని ప్రజారాజ్యంతో కలిసి పని చేస్తామని సిపిఎం రాష్ట్ర కార్యదర్శి బివి రాఘవులు చెప్పారు. ప్రజారాజ్యంతో పొత్తు గురించి ఇప్పుడే ఆలోచించడం లేదని ఆయన బుధవారం మీడియా ప్రతినిధులతో అన్నారు. తెలుగుదేశం సహా అన్ని లౌకిక పార్టీలతో కలిసి ప్రజాసమస్యలపై పోరాటం చేస్తామని, ప్రజారాజ్యం కలిసి వస్తే తమకు అభ్యంతరం లేదని ఆయన అన్నారు. కాంగ్రెసు పార్టీ వ్యతిరేక ఓట్లు చీలడం వల్ల మహా కూటమి ఓడిపోయిందని ఆయన అన్నారు. సర్దుబాట్లు, ఓట్ల బదిలీ సరిగా జరగకపోవడం వల్ల కూడా సమస్యలు తలెత్తాయని, అయితే ఇవి సరిగా జరిగి ఉంటే మహా కూటమికి మరిన్ని సీట్లు వచ్చి ఉండేవే తప్ప ఫలితాలు తారుమారు అయి ఉండేవి కావని ఆయన అన్నారు.

ముగిసిన విషయాలపై వాదోపవాదాల వల్ల ఒరిగేదేం లేదని, మంగళగిరి గురించి వామపక్షాలు ఇంకా వాదులాడటం అనవసరమని రాఘవులు అన్నారు. ఇందులో క్షమాపణలకు తావు లేదన్నారు. ప్రజాసమస్యలపై పోరాటంలో భావసారూప్యం ఉన్న పార్టీలతోనే ఒకపై పొత్తులు ఉంటాయన్నారు. కాంగ్రెస్‌, బిజెపియేతర పార్టీలు ఏవైనా కలిసి పనిచేస్తామన్నారు.