యాసిడ్‌ దాడులపై ప్రత్యేక చట్టం:సబిత

రాజమండ్రి: మహిళలపై జరుగుతున్న యాసిడ్‌ దాడులపై నిందితులను కఠినంగా శిక్షించేందుకు ప్రత్యేక చట్టాన్ని తీసుకువస్తామని రాష్ట్రహోంమంత్రి సబితా ఇంద్రారెడ్డి చెప్పారు. రాజమండ్రిలో బుధవారం ఆమె మీడియాతో మాట్లాడారు. దీనికి సంబంధించిన నివేదికను కేంద్రానికి పంపినట్లు ఆమె తెలిపారు. త్వరలోనే ప్రత్యేక బిల్లును తెచ్చేందుకు ముఖ్యమంతితో మాట్లాడి కృషి చేస్తామని అన్నారు.

ఇంతకు ముందు విద్యాసంస్థలకే పరిమితమైన యాసిడ్ దాడులు ఎక్కడ పడితే అక్కడ జరుగుతున్నాయని ఆమె అన్నారు. రాష్ట్రంలో ఖాళీగా ఉన్న 37వేల కానిస్టేబుళ్ళ పోస్టులను భర్తీ చేస్తామని అందులో 20 శాతం మహిళలకు కేటాయిస్తామని మంత్రి తెలిపారు. అలాగే సత్ప్రవర్తన కలిగిన జీవిత ఖైదీల విడుదల జాబితాను ముఖ్యమంత్రి డాక్టర్‌ రాజశేఖర్‌ రెడ్డి త్వరలోనే విడుదల చేస్తారని సబితారెడ్డి పేర్కొన్నారు.