చిరు మంచి మాటన్నారు: రోశయ్య

హైదరాబాద్‌: ప్రజారాజ్యం పార్టీ అధ్యక్షుడు చిరంజీవి మంచి మాటన్నారని, మిత్రాయే కాదు నేను పోయినా పార్టీ ఉంటుందనేది ఆ మంచి మాట అని ఆర్థిక మంత్రి, సీనియర్ కాంగ్రెసు నాయకుడు కె.రోశయ్య అన్నారు. తమ పార్టీలో ముఖ్యమంత్రి వైయస్ రాజశేఖర రెడ్డి చిచ్చు పెట్టారని తెలుగుదేశం పార్టీ అధ్యక్షుడు నారా చంద్రబాబు నాయుడు ఆరోపించడాన్ని ఆయన గురువారం మీడియా ప్రతినిధుల సమావేశంలో తీవ్రంగా తప్పు పట్టారు. చిరంజీవి స్పోర్టివ్ గా వ్యవహరించారని, అది చంద్రబాబుకు లేకుండా పోయిందని ఆయన అన్నారు.

పార్టీలోని బలహీనతలను సరిచేసుకోవడానికి బదులు చంద్రబాబు తమపై విమర్సలు చేయడం సరి కాదని ఆయన అన్నారు. కాంగ్రెస్ పార్టీ జయాపజయాలను సమానంగా తీసుకుంటుందని ఆయన అన్నారు. పార్టీ వైఫల్యానికి కారణాలను విశ్లేషించుకోవడానికి బదులు కాంగ్రెసుపై విమర్శలు చేయడంలో అర్థం లేదని ఆయన అన్నారు. తాము కూడా గతంలో వరుసగా ఓడిపోయామని, దాంతో తాము దుకాణాన్ని మూసేసుకోలేదని ఆయన అన్నారు. కాంగ్రెసుకు ఉన్న స్ఫూర్తి వేరని ఆయన అన్నారు.