తలసానిపై క్రమశిక్షణా చర్య?

హైదరాబాద్: పార్టీ వైఖరిపై బహిరంగ వ్యాఖ్యలు చేసిన తమ పార్టీ నాయకుడు తలసాని శ్రీనివాస యాదవ్ పై తెలుగుదేశం పార్టీ అధ్యక్షుడు నారా చంద్రబాబు నాయుడు క్రమశిక్షణా చర్యలు తీసుకునే అవకాశాలున్నాయి. పార్టీ వైఖరిని తప్పుపడుతూ విమర్శలు చేస్తున్నట్లు కనిపిస్తున్నప్పటికీ తలసాని శ్రీనివాస యాదవ్ పార్టీని వీడేందుకే ఈ పని చేస్తున్నారని తెలుగుదేశం వర్గాలు అనుకుంటున్నాయి. ఆయన కాంగ్రెసులోకి వెళ్లే అవకాశాలున్నట్లు వార్తలు వస్తున్నాయి. హైదరాబాద్ నగర మేయర్ అభ్యర్థిగా తలసాని శ్రీనివాస యాదవ్ పేరును ఖరారు చేసేందుకు ముఖ్యమంత్రి డాక్టర్ వైయస్ రాజశేఖర రెడ్డి అంగీకరించినట్లు చెబుతున్నారు.

తలసాని శ్రీనివాస్ యాదవ్ వ్యవహారంపై చంద్రబాబు గురువారం సాయంత్రం పార్టీ నాయకులతో మాట్లాడుతున్నారు. ఆ తర్వాత పార్టీ క్రమశిక్షణా సంఘం సమావేశమై శ్రీనివాస యాదవ్ పై చర్యకు సిఫార్సు చేసే అవకాశం ఉంది. తెలుగుదేశం నాయకుడు తీగెల కృష్ణా రెడ్డి తలసాని విమర్శల వెనక కాంగ్రెసు కుట్ర ఉందని ఆరోపిస్తున్నారు. ఈ స్థితిలో ఆయనకు నచ్చజెప్పినా ఫలితం ఉండదనే అభిప్రాయం వినిపిస్తోంది.

శ్రీనివాస్ యాదవ్ కాంగ్రెసులో చేరుతున్నట్లు తనకు ఏ విధమైన సమాచారం లేదని ప్రదేశ్ కాంగ్రెసు కమిటీ (పిసిసి) అధ్యక్షుడు డి.శ్రీనివాస్ గుంటూరులో అన్నారు. ఆ విషయంపై తనను ఎవరూ సంప్రదించలేదని ఆయన అన్నారు. అయితే, తలసానికి కాంగ్రెసుకు ఇప్పటికే స్పష్టమైన హామీ ఇచ్చినట్లు చెబుతున్నారు.