కెసిఆర్ కు వినోద్ చురకలు

వరంగల్: తెలంగాణ రాష్ట్ర సమితి (తెరాస) అధ్యక్షుడు కె.చంద్రశేఖరరావుపై పార్టీ మాజీ పార్లమెంటు సభ్యుడు వినోద్ కుమార్ సంచలన వ్యాఖ్యలు చేశారు. దీంతో తెరాసలో మరోసారి కలకలం మొదలైంది. సంచలన వ్యాఖ్యలు చేసిన వినోద్ కుమార్ ఇప్పటి వరకు కెసిఆర్ కు అత్యంత సన్నిహితుడు. కెసిఆర్ పరిస్థితులను ఆకళింపు చేసుకుని ఉమ్మడి నాయకత్వంతో ముందు సాగాలని వినోద్ కుమార్ బుధవారం మీడియా ప్రతినిధుల సమావేశంలో అన్నారు. అలా సాగడానికి ముందుకు రాకపోతే ప్రజల అవిశ్వాసం పెరుగుతుందని ఆయన అన్నారు. ఉమ్మడి నిర్ణయాలను గౌరవించకపోతే అధ్యక్షుని మార్పు తప్పదని ఆయన అన్నారు. విమర్శలను ప్రజాస్వామ్య స్ఫూర్తితో స్వీకరించి ముందుకు వెళ్లకపోతే కెసిఆర్ నాయకత్వాన్ని ప్రజలు వ్యతిరేకిస్తారని ఆయన అన్నారు.

పార్టీ మనుగడ కోసం ఉమ్మడి నాయకత్వం అవసరమని, కెసిఆర్, కెటిఆర్ విమర్శలను స్వీకరిస్తామని చెప్పారని ఆయన అన్నారు. ఒంటెత్తు పోకడల వల్లనే ఎన్నికల్లో పార్టీ ఓడిపోయిందని ఆయన అభిప్రాయపడ్డారు. మహాకూటమితో పొత్తు పెట్టుకోవడం వల్ల ప్రజలు తెరాసను నమ్మలేదని ఆయన అన్నారు. తెలంగాణ ఉద్యమాన్ని ఉధృతం చేసేందుకు కృషి చేస్తామని ఆయన చెప్పారు.