వారినే అడగండి: తలసాని

హైదరాబాద్: ముఖ్యమంత్రి డాక్టర్ వైయస్ రాజశేఖర రెడ్డిని తాను కలిసినట్లు వచ్చిన వార్తలను ధృవీకరించడానికి తెలుగుదేశం పార్టీ నాయకుడు తలసాని శ్రీనివాస యాదవ్ నిరాకరించారు. తాను ముఖ్యమంత్రిని కలిశానని గానీ, కలువలేదని గానీ ఆయన స్పష్టంగా చెప్పలేదు. చాలా సేపు మీడియా ఎదుటకు రావడానికి నిరాకరించిన శ్రీనివాస్ యాదవ్ కు మీడియా ఎదుట పడక తప్పలేదు. మీరు ముఖ్యమంత్రిని క్యాంపు కార్యాలయంలో కలిశారా, లేదా అని అడిగితే తనను చూసినవారినే అడగండి అని ఆయన సమాధానమిచ్చారు. ఆ విషయంపై మీడియా ప్రతినిధులు ఒత్తిడి చేయగా తనను చూసినవారినే అడగాలని, అదే ప్రశ్న వేస్తూ తనను గందరగోళానికి గురి చేయవద్దని చెప్పి వెళ్లిపోయారు.

తాను సమైక్యాంధ్ర నినాదంతో ముందుకు వచ్చానని, పార్టీ తెలంగాణ అనుకూల వైఖరిని మార్చుకోవాలని కోరారని ఆయన అన్నారు. తెలుగుదేశం పార్టీ అధ్యక్షుడు నారా చంద్రబాబు నాయుడితో అన్ని విషయాలు మాట్లాడానని ఆయన చెప్పారు. తాజాగా సోమవారంనాడు ముఖ్యమంత్రి డాక్టర్ వైయస్ రాజశేఖర రెడ్డిని కలిసినట్లు వచ్చిన వార్త కలకలం సృష్టించింది.