మొద్దు'సీను'మరో సస్పెన్స్ !!

హైదరాబాద్‌: మొద్దు శీను హత్య కేసులో నిందితుడైన ఓంప్రకాశ్‌ ఆరోగ్య పరిస్థితి పూర్తి స్ధాయిలో క్షీణించినట్లు సమాచారం. ప్రస్తుతం అతను చర్లపల్లి జైల్లోని హాస్పిటల్‌ వార్డులో చికిత్స పొందుతున్నాడు. పరిటాల హత్య కేసులో అరెస్టయిన మొద్దు శీను అనంతపురం జిల్లా జైల్లో ఉన్న సమయంలో అదే బ్యారక్‌లో ఉన్న ఓంప్రకాశ్‌, డంబెల్స్‌తో మొద్దు శీను తలపై మోది హత్య చేసినట్టుగా పేర్కొన్న విషయం తెలిసిందే.

అయితే కొద్ది రోజుల క్రిందట ఓంప్రకాశ్‌ ఆరోగ్య పరిస్థితి దెబ్బతినటంతో అతన్ని చర్లపల్లి జైలుకు మార్చారు. ఆ తరువాత నిమ్స్‌లో పరీక్షలు జరిపించగా రెండు కిడ్నీలూ విఫలమైనట్టుగా నిర్ధారణ అయింది. తర్వాత కొన్నాళ్లు అతనికి ఉస్మానియా ఆస్పత్రిలో చికిత్స చేశారు. ఇటీవలే అతన్ని తిరిగి చర్లపల్లి జైలుకు తరలించారు. అయితే రెండు రోజులుగా ఓంప్రకాశ్‌ ఆరోగ్య పరిస్థితి ఆందోళనకరంగా మారినట్టు తెలిసింది.