మంగళసూత్రం లేకపోయినా భార్యే

మధురై: హిందూ సంప్రదాయం ప్రకారం పెళ్ళి జరిగిందని నిరూపించేందుకు మంగళసూత్రం తప్పనిసరిగా ఉండనక్కర్లేదని, అది లేనంత మాత్రాన ఆమె తన భార్య కాదనడం భావ్యం కాదని మద్రాస్ హైకోర్టు సంచలనాత్మక తీర్పు ఇచ్చింది. తమిళనాడుకు చెందిన ఓ యువతి తన భర్త కళాధర్ అన్యాయం చేసాడంటూ కోర్టుని ఆశ్రయించగా ఆ కోర్టు ఆమెకు అనుకూలంగా డిక్రీ ఇచ్చింది. దీనిపై భర్త హైకోర్టును ఆశ్రయించాడు. దీంతో హైకోర్టు ఈ కేసును మధురై బెంచ్ కు బదిలీ చేసింది.

ఆమె తన భార్య అని నిరూపించేందుకు మంగళసూత్రం చూపించాలని కళాధర్ కోరాడు. అయితే 1987లో ఓ దేవాలయంలో కేవలం దండలు మార్చుకోవడం ద్వారా పెళ్ళి జరగడంతో ఆమె మంగళసూత్రాన్ని సాక్ష్యంగా చూపలేకపోయింది. దీంతో ఆమె తన భార్య కాదని చెబుతూ కళాధర్ ఆమెను వదిలించుకోవాలని చూసాడు. ఈ సందర్భంగా కేసును విచారించిన న్యాయమూర్తి జస్టిస్ సుందరేష్ పెళ్ళికి మంగళసూత్రమే ఆధారం కాదు. మంగళసూత్రం లేదంటూ ఆమె తన బార్య కాదని చెబుతూ వదిలించుకోలేరు. కళాధరే తన భర్త అని నిరూపించేందుకు ఆమె ఎలాంటి ఆధారాలైనా చూపించవచ్చు అంటూ అనుకూలంగా తీర్పు నిచ్చారు.