చిరు పార్టీ వైపు నారాయణ చూపు

హైదరాబాద్: వచ్చే గ్రేటర్ హైదరాబాద్ ఎన్నికల్లో చిరంజీవి నాయకత్వంలోని ప్రజారాజ్యం పార్టీతో పొత్తు పెట్టుకునేందుకే సిపిఐ రాష్ట్ర కార్యదర్శి కె నారాయణ మొగ్గు చూపుతున్నట్లు కనిపిస్తోంది. గ్రేటర్ హైదరాబాద్ ఎన్నికల్లో ప్రజారాజ్యం, సిపిఐ, సిపిఎం కలిసి పోటీ చేస్తే మంచిదని ఆయన మంగళవారం మీడియా ప్రతినిధులతో అన్నారు. అయితే ఈ విషయంలో చర్చలు కొలిక్కి రాలేదని ఆయన చెప్పారు. ప్రజారాజ్యం, తెలుగుదేశం పార్టీలు కలహాలు మాని కలిసి చేస్తే బాగుంటుందని కూడా ఆయన అభిప్రాయపడ్డారు.

సిపిఎం రాష్ట్ర కార్యదర్శి బివి రాఘవులు మాత్రం తెలుగుదేశం పార్టీతో పొత్తుకే మొగ్గు చూపుతున్నట్లు తెలుస్తోంది. తెలుగుదేశంతో సయోధ్యకు వస్తేనే ప్రజారాజ్యం పార్టీతో పొత్తు సాధ్యమవుతుందని రాఘవులు చెబుతున్నట్లు సమాచారం. రాఘవులుతో ప్రజారాజ్యం పార్టీ నేత టి.దేవేందర్ గౌడ్ మంగళవారం చర్చలు జరిపారు. ఈ చర్చల్లో రాఘవులు అదే విషయం చెప్పినట్లు తెలుస్తోంది. అయితే ప్రజారాజ్యం మాత్రం తెలుగుదేశం పార్టీతో కలిసి పని చేయడానికి సుముఖంగా లేనట్లు తెలుస్తోంది.