జెపిపై బహిరంగ తిరుగుబాటు

హైదరాబాద్‌: తాజాగా జయప్రకాష్ నారాయణ నేతృత్వంలోని లోకసత్తాలో అసమ్మతి సెగలు రాజుకున్నాయి. జయప్రకాష్ నారాయణపై అసమ్మతివాదులు 13 ప్రశ్నలను సంధిస్తూ ఒక బహిరంగ లేఖ రాశారు. కులం, ప్రాంతం అంటూ నీతులు వల్లించే జయప్రకాష్ నారాయణ కూకట్ పల్లి నియోజకవర్గం నుంచే ఎందుకు పోటీ చేశారని వారు ప్రశ్నించారు. కూకట్ పల్లి నియోజకవర్గంలో ఎక్కవ మంది కోస్తా ప్రాంతానికి చెందిన కమ్మ కులంవారు నివాసం ఉన్న విషయం అందరికీ తెలిసిందే.

సంస్థాగంత కార్యకర్తలు ఎన్నుకున్న జిల్లా, మండల కమిటీలను ఎందుకు ఏడు నెలల్లోనే ఎందుకు రద్దు చేశారని అసమ్మతి వాదులు జెపిని ప్రశ్నించారు. ధన రాజకీయాలు చేయడానికే లోకసత్తా ఏర్పడిందని వారు విమర్శించారు. జయప్రకాష్ నారాయణపై ఇటీవల తెలుగుదేశం పార్టీ అధ్యక్షుడు నారా చంద్రబాబు నాయుడు తీవ్ర విమర్సలు చేసిన విషయం తెలిసిందే. కులానికి, మతానికి, ప్రాంతానికి తాను, తన పార్టీ అతీతమని చెప్పుకుంటూ రాజకీయ ప్రక్షాళనకే తాను రాజకీయాల్లోకి వచ్చానని చెప్పుకుంటున్న జెపికి ఈ తిరుగుబాటు తలబొప్పి కట్టించేదే.