పౌరుషాలు వద్దు: చిరు సలహా

హైదరాబాద్: విలువైన సభా సమయాన్ని మన అవసరాల కోసం, పౌరుషాల కోసం వాడుకోవద్దని ప్రజారాజ్యం పార్టీ అధినేత చిరంజీవి ముఖ్యమంత్రి డాక్టర్ వైయస్ రాజశేఖర రెడ్డి, ప్రతిపక్ష నాయకుడు నారా చంద్రబాబునాయుడులకు సలహా ఇచ్చారు. వైయస్, చంద్రబాబు చేసుకున్న సవాళ్లు, ప్రతిసవాళ్లపై ఆయన సోమవారం శాసనసభలో ప్రతిస్పందించారు. ప్రజాసమస్యలు ఎందుకు పరిష్కారం కావడం లేదో తనకు ఇప్పుడు అర్థమవుతోందని, ప్రజాసమస్యల పరిష్కారానికి రాజకీయ పార్టీలు చిత్తశుద్ధితో పని చేస్తున్నాయని అనుకుంటూ ఉండేవాడనని, ఇప్పుడు తన అభిప్రాయం తప్పని తేలిపోయిందని ఆయన అన్నారు.

ప్రజా సమస్యలు పరిష్కారం కాకపోవడానికి మనలోనూ, మన ఆలోచనల్లోనూ తప్పు ఉందని తేలిపోయిందని ఆయన అన్నారు. తప్పు మన సవాళ్లలోనే ఉందని ఆయన అన్నారు. విలువైన సభా సమయాన్ని వ్యక్తిగతంగా వెళ్లి వృధా చేస్తున్నారని ఆయన అన్నారు. ఈ స్ఫూర్తితో ప్రజా సమస్యల పరిష్కారానికి పని చేస్తే అవి పరిష్కారమవుతాయని ఆయన అన్నారు. ప్రజా సమస్యలనే సవాళ్లుగా స్వీకరిద్దామని ఆయన సూచించారు.