స్పీకర్ పైకి మైక్ విసిరిన ముఫ్తీ

ముంబై: జమ్మూ-కాశ్మీర్‌ శాసన సభ సోమవారంనాడు రణరంగంగా మారింది.సభలో పిడిపి సభ్యురాలు మహబూబా ముఫ్తి ఇప్పుడు సహనం కోల్పోయారు. స్పీకర్ వేదికపైకి దూసుకువెళ్లిన ముఫ్తి స్పీకర్‌పైకి మైక్‌ ను విసిరేయబోయారు. స్పీకర్‌ కూడా మహబూబాను తీవ్రంగా గద్దించారు. ఉభయుల మధ్యా తీవ్ర వాగ్యుద్ధం జరిగింది. భద్రతావిభాగానికి చెందిన మహిళా సిబ్బంది వచ్చి ఆమెను బయటకు పంపించేశారు. జమ్మూ-కాశ్మీర్‌ శాసన సభలో షోబియాన్‌ హత్యల గురించిన చర్చ విషయంలో ముందు గొడవ ప్రారంభమైంది. అంతకుముందు భారతీయ జనతా పార్టీ సభ్యులు మాట్లాడడానికి సభాపతి అనుమతి ఇచ్చారు. షోబియాన్‌ అత్యాచారం, హత్యల సంఘటనపై చర్చించడానికి తమకు ఎందుకు అనుమతి ఇవ్వడంలేదని, స్పీకర్‌ సభలో వివక్ష చూపుతున్నారనీ పిడిపి అధ్యక్షురాలు మహబూబా ముఫ్తి ఆరోపించారు.

ముందు తమను మాట్లాడనివ్వాలని కోరుతూ ముఫ్తి సభా ప్రాంగణంలోకి దూసుకువెళ్లారు. ఆమె స్పీకర్‌ వైపు వెళ్తుండగా, మహిళా భద్రతా విభాగానికి చెందిన ఒకరు ఇది మామూలే అన్నట్టు నవ్వుతూ వచ్చి ముఫ్తిని ఆపే ప్రయత్నం చేశారు. కాని ముఫ్తి వేగంగా ఇంకా ముందుకు దూసుకుపోగా, స్పీకర్‌ ఈమెను బయటకు తీసుకుపోండని భద్రతా సిబ్బందిని ఆదేశించారు. అంతలో ముఫ్తి ఆవేశంతో ఊగిపోతూ నన్ను బయటక తీసుకుపొమ్మంటావా అంటూ స్పీకర్‌ వేదికపైకి లంఘించారు. అక్కడున్న కాగితాలు ఇవతలికి తోసేస్తూ వేదికపై బిగించివున్న మైక్‌ను బలవంతంగా గుంజారు. ఆ మైక్‌ను సభాపతిపైకి విసిరేటట్టు ఆమె కనిపించడంతో భద్రతా సిబ్బంది ఆమెను బయటకు తీసుకువెళ్లారు. ఆమెతో పాటు సభలో నినాదాలు చేసిన ఆమె పార్టీ సభ్యులను కూడా బయటకు తీసుకువెళ్లారు.

మాట్లాడుతూ జరిగిన దానికి తాను క్షమాపణలు కోరవలసిన అవసరం లేదని, సభలో ఇంత జరుగుతున్నా ముఖ్యమంత్రి పల్లెత్తు మాట్లాడలేదని సభ వెలుపలికి వచ్చిన అనంతరం ముఫ్తీ మీడియా ప్రతినిధులతో అన్నారు. పాలకపక్షమే తమను ఇంత వివక్షకు గురిచేసినందుకు క్షమాపణ చెప్పాలని ఆమె కోరారు. స్పీకర్‌ తమపై పార్లమెంటరీ సంప్రదాయాలకు విరుద్ధంగా టేక్‌ దిస్‌ లేడీ అవుట్‌ అంటూ అవమానకరంగా ప్రవర్తించారని ఆమె చెబుతున్నారు.