గ్రేటర్‌ ఎన్నికలపై నారాయణ అనుమానం

గుంటూరు: గ్రేటర్‌ ఎన్నికలు జరగడం అనుమానమేనని సీపీఐ రాష్ట్ర కార్యదర్శి నారాయణ అన్నారు. రిజర్వేషన్ల ఖరారులో, డివిజన్ల కూర్పులో అవకతవకలు జరిగినందున గ్రేటర్ హైదారాబాద్ ఎన్నికలు వెంటనే జరగకపోవచ్చునని ఆయన సోమవారం గుంటూరులో మీడియా ప్రతినిధుల సమావేశంలో అన్నారు. కందిపప్పు ధర విపరీతంగా పెరిగినందున కాంగ్రెసు పార్టీ గ్రేటర్ హైదరాబాద్ ఎన్నికలకు వెంటనే సిద్ధంగా ఉండకపోవచ్చునని ఆయన అబిప్రాయపడ్డారు. ఈ స్థితిలో గ్రెటర్ హైదరాబాద్ ఎన్నికలు వాయిదా పడవచ్చునని ఆయన అన్నారు.

హైదరాబాద్‌లో కాంగ్రెస్‌, ఎంఐఎంలు బలంగా ఉన్నాయన్నారు. విధానాలను పక్కనపెట్టి విశాల దృక్పథంతో ప్రతిపక్షాలన్నింటినీ ఏకం చేస్తున్నామని నారాయణ తెలిపారు. బోగస్‌ కార్డులపై ప్రభుత్వం శ్వేతపత్రం విడుదల చేయాలని ఆయన డిమాండ్‌ చేశారు. రిలయన్స్‌ గ్యాస్‌ మనరాష్ట్రానికి దక్కిన తర్వాతే మిగిలిన ప్రాంతాలకు వెళ్లాలని ఈ విషయమై కేంద్రంపై ఒత్తిడి తేవాలన్నారు.ధరల పెరుగుదలకు నిరసనగా వచ్చే నెల 4వ తేదీన అన్ని మున్సిపాలిటీల ముందు ప్రదర్శనలు నిర్వహించనున్నట్లు ఆయన తెలిపారు.