నిద్ర పట్టే మందు వల్లే జాక్సన్ మృతి?

లాస్ ఏంజెల్స్: వ్యక్తిగత వైద్యుడు మోతాదు మించిన నిద్ర పట్టే మందు ఇవ్వడం వల్లనే పాప్ రారాజు మైఖెల్ జాక్సన్ మృతి చెంది ఉంటాడని దర్యాప్తు అధికారులు అనుమానిస్తున్నారు. దర్యాప్తు కొనసాగుతున్నందున ఆ విషయాన్ని చెప్పిన అధికారి తన పేరు వెల్లడించడానికి నిరాకరించాడు. దర్యాప్తు అధికారులు జాక్సన్ అద్దెకు తీసుకుని ఉంటున్న ఇంటిలో సోదాలు నిర్వహించారు. వారికి ఒక గదిలో ఆక్సిజన్ ట్యాంక్స్, ఫోర్ డ్రిప్ కనిపించాయి. మరో గదిలో వస్త్రాలు, ఇతర వస్తువులు కనిపించాయి.

నిద్ర పట్టడానికి జాక్సన్ ప్రొపొఫోల్ తీసుకుంటూ ఉండేవాడని, జూన్ 25వ తేదీన జాక్సన్ కు అతని వ్యక్తిగత వైద్యుడు కొన్రాడ్ ముర్రే ఆ డ్రగ్ ఇచ్చాడని పోలీసు అధికారి అంటున్నాడు. ఆ రోజు ఇచ్చిన ప్రొపొఫోల్ వల్లనే జాక్సన్ గుండె ఆగిపోయి ఉండవచ్చునని అనుమానిస్తున్నారు. ఆ డ్రగ్ ను జాక్సన్ రెండేళ్లుగా వాడుతున్నాడట. ముర్రే కాకుండా ఎంత మంది వైద్యులు జాక్సన్ కు ఆ డ్రగ్ ఇచ్చారనే విషయాన్ని కనుక్కోవడంపై పోలీసులు దృష్టి పెట్టారు. ముర్రే న్యాయవాది మాత్రం ఆ ఆరోపణలను ఖండిస్తున్నట్లు వార్తలు వస్తున్నాయి.