రాఖీ సావంత్ పై ఎఫ్ ఐఆర్

జైపూర్: కాపీ రైట్ యాక్టును ఉల్లంఘించారనే ఆరోపణపై ఐటం గర్ల్ రాఖీ సావంత్ పై ఎఫ్ ఐఆర్ నమోదు చేయాలని జైపూర్ స్థానిక కోర్టు పోలీసులను ఆదేశించింది. ఆమెతో పాటు ఆరుగురిపై కూడా ఎఫ్ ఐఆర్ నమోదు చేయాలని కోర్టు మంగళవారం పోలీసులను ఆదేశించింది. తన స్క్రిప్టును దొంగిలించడంతో పాటు తన స్వయంవర్ అనే తన కాన్సెప్ట్ ను కూడా కాపీ కొట్టి రియాల్టీ షోను రూపొందించారని గౌరవ్ తివారీ అనే వ్యక్తి ఫిర్యాదు చేశాడు.

రాఖీ కా స్వయంవర్ ను తన అనుమతి లేకుండా వాడుకున్నారని అతను ఫిర్యాదు చేశాడు. రాఖీ కా స్వయంవర్ రియాల్టీ షోను ప్రసారం చేస్తున్న టీవీ చానెల్ మేనేజింగ్ డైరెక్టర్, కార్యక్రమం ఎగ్జిక్యూటివ్ డైరెక్టర్ లపై, కార్యక్రమంలో పాల్గొంటున్న మరో ఇద్దరిపై కేసు నమోదు చేయాలని జ్యుడిషియల్ మెజిస్ట్రేట్ ఆదేశించారు.