వైయస్ కు శిక్షణ ఇస్తాం: బాబు

హైదరాబాద్: ముఖ్యమంత్రి డాక్టర్ వైయస్ రాజశేఖర రెడ్డికి తాము శిక్షణ ఇస్తామని తెలుగుదేశం పార్టీ అధ్యక్షుడు నారా చంద్రబాబు నాయుడు అన్నారు. చంద్రబాబు వద్ద పాఠాలు నేర్చుకోవాల్సిన అవసరం లేదని శుక్రవారం ఉదయం ప్రశ్నోత్తరాల సమయంలో వైయస్ చేసిన వ్యాఖ్యకు చంద్రబాబు ప్రతిస్పందిస్తూ ఆ విధంగా అన్నారు. వైయస్ రాజశేఖర రెడ్డికి తాము శిక్షణ ఇచ్చే రోజు తప్పకుండా వస్తుందని ఆయన అన్నారు. వైయస్ కు శిక్షణ ఇవ్వాల్సిన అవసరం ఉందని ఆయన అన్నారు. కాంగ్రెసు నూతన శాసనసభ్యులకు పార్టీ శిక్షణ ఇచ్చిన విషయాన్ని ఆయన ఈ సందర్భంగా గుర్తు చేశారు.

వైయస్ కు పునశ్చరణ తరగతులు తీసుకుంటామని చంద్రబాబు అన్నారు. గిరిజనులకు తమ ప్రభుత్వం హయాంలో కేటాయించిన నిధులను ఆయన చెప్పారు. గిరిజనుల ఆరోగ్యాన్ని, సమస్యలను ప్రభుత్వం పట్టించుకోవడం లేదని ఆయన విమర్శించారు. ఈ సమయంలో స్పీకర్ కిరణ్ కుమార్ రెడ్డి జోక్యం చేసుకుని వాతావరణాన్ని చల్లబరిచే ప్రయత్నం చేశారు. ఇద్దరు సీనియర్ నాయకులు, ఇరువురు 1978లోనే రాజకీయాల్లోకి వచ్చారు, ఇద్దరి మధ్య సారూప్యత ఉంది, ఇంతటితో ముగించండి అని ఆయన అన్నారు. దీంతో వాగ్వివాదం సద్దుమణిగింది.