గౌడ్ పై నోరు విప్పని అల్లు అరవింద్

హైదరాబాద్: తమ పార్టీ నాయకుడు టి.దేవేందర్ గౌడ్ వ్యవహారంపై నోరు మెదపడానికి ప్రజారాజ్యం పార్టీ ప్రధాన కార్యదర్శి, చిరంజీవి బావమరిది అల్లు అరవింద్ నోరు మెదపలేదు. ప్రజారాజ్యం అధినేత చిరంజీవితో పార్టీ సీనియర్ నేతలు శనివారం సమావేశమయ్యారు. ఈ సమావేశంలో పలు అంశాలు చర్చించినట్లు సమాచారం. సమావేశం ముగిసిన అనంతరం మీడియాతో మాట్లాడడానికి అల్లు అరవింద్, ఆ పార్టీ మరో నేత సి.రామచంద్రయ్య మాట్లాడడానికి ఇష్టపడలేదు.

దేవేందర్ గౌడ్ పార్టీకి రాజీనామా చేసి తెలుగుదేశంలో చేరుతున్నట్లు వచ్చిన వార్తలపై చిరంజీవితో జరిగిన సమావేశంలో ప్రధానంగా చర్చ జరిగినట్లు తెలుస్తోంది. శనివారం ఉదయమే దేవేందర్ గౌడ్ చిరంజీవితో సమావేశమయ్యారు. తన నిర్ణయాన్ని దేవేందర్ గౌడ్ చిరంజీవికి కూడా స్పష్టంగా చెప్పినట్లు సమాచారం. ఈ స్థితిలో ఏం చేయాలనే విషయంపై చిరంజీవి సీనియర్ నేతలతో మాట్లాడినట్లు తెలుస్తోంది.