చిరంజీవితో దేవేందర్ గౌడ్ భేటీ

హైదరాబాద్: పార్టీకి రాజీనామా చేయాలనుకుంటున్న టి. దేవేందర్ గౌడ్ శనివారం ఉదయం ప్రజారాజ్యం పార్టీ అధినేత చిరంజీవితో సమావేశమయ్యారు.చిరంజీవికి ఆయన తాన రాజీనామా లేఖను సమర్పించవచ్చుననే ఊహాగానాలు చేలరేగుతున్నాయి. తాను రాజీనామా చేయాలని అనుకోవడానికి గల కారణాలను ఆయన చిరంజీవికి వివరించారు. తన రాజకీయ భవిష్యత్తును దృష్టిలో ఉంచుకునే ఈ నిర్ణయం తీసుకుంటున్నట్లు ఆయన తెలిపారు. ఇంతకు ముందు ఆయన ప్రజారాజ్యం పార్టీ ప్రధాన కార్యదర్శి అల్లు అరవింద్ తో కూడా ఆయన ఇదే విషయం చెప్పినట్లు భావిస్తున్నారు.

ప్రజారాజ్యం పార్టీకి రాజీనామా చేసి ఆయన తెలుగుదేశం పార్టీలో చేరాలని నిర్ణయించుకున్నట్లు వార్తలు వస్తున్నాయి. ఆయన ఈ నెల 8వ తేదీన తెలుగుదేశం పార్టీలో చేరనున్నట్లు కూడా చెబుతున్నారు. దేవేందర్ గౌడ్ ను తిరిగి పార్టీలో చేర్చుకునే విషయంపై తెలుగుదేశం పార్టీ అధ్యక్షుడు నారా చంద్రబాబు నాయుడు పార్టీ నాయకులతో విస్తృతంగా చర్సిస్తున్నారు. తన సహచరుడు పెద్దిరెడ్డితో కలిసి దేవేందర్ తెలుగుదేశం పార్టీలో చేరే అవకాశం ఉంది.