వైయస్ కుటిల రాజకీయాలు: బాబ

హైదరాబాద్: తాము తలుపులు బార్లా తెరిస్తే ప్రతిపక్షాలు ఖాళీ అవుతాయని, రోజా వంటి వారు కూడా కాంగ్రెసు పార్టీలో చేరడానికి సిద్ధంగా ఉన్నారని ముఖ్యమంత్రి డాక్టర్ వైయస్ రాజశేఖర రెడ్డి చేసిన ప్రకటనపై తెలుగుదేశం పార్టీ అధ్యక్షుడు నారా చంద్రబాబు నాయుడు తీవ్రంగా మండిపడ్డారు. ప్రతిపక్షాల్లో కలకలం సృష్టించి, ప్రతిపక్షాలను గందరగోళపరిచేందుకే వైయస్ ఆ విధంగా మాట్లాడుతున్నారని ఆయన అన్నారు. ముఖ్యమంత్రి స్థాయికి అది తగదని ఆయన బుధవారం మీడియా ప్రతినిధులతో అన్నారు.

వైయస్ రాజశేఖర రెడ్డి రాజకీయాలను కలుషితం చేస్తున్నారని ఆయన వ్యాఖ్యానించారు. ముఖ్యమంత్రి ప్రవర్తనకు అటువంటి ప్రకటనలు చేయడం తగదని ఆయన హితవు చెప్పారు. కలుషిత రాజకీయాలు చేసి ముఖ్యమంత్రి ఏం సాధించదలుచుకున్నారని ఆయన ప్రశ్నించారు. ధరల పెరుగుదల వంటి ప్రజా సమస్యలను వదిలేసి ప్రతిపక్షాలను నిర్వీర్యం చేసే పనిలో వైయస్ పడిపోయారని, అది ముఖ్యమంత్రి వల్ల కాదని ఆయన అన్నారు.