మగధీర పైరసీ సిడీల పట్టివేత

కడప: ప్రజారాజ్యం పార్టీ అధినేత చిరంజీవి కుమారుడు రామ్ చరణ్ తేజా నటించిన మగధీర సినిమాకు సంబంధించి పైరసీ సీడీలను కడపలో యాంటీ పైరసీ స్క్వాడ్ సిబ్బంది స్వాధీనం చేసుకున్నారు. కడపకు చెందిన నాగేశ్వరరావు, అతని కుమారుడు రవి పైరసీ సీడీలు తయారు చేస్తున్నారనే సమాచారం అందుకున్న వారు దాడులు నిర్వహించి వాటిని స్వాధీనం చేసుకున్నారు. దాదాపు 50 లక్షల సీడీలను వారు స్వాధీనం చేసుకున్నారు. వాటి విలువ లక్ష రూపాయలకు పైగా ఉంటుందని అంచనా.

రవి రెండు మూడు చోట్ల సీడీలు తయారు చేస్తున్నాడని సమాచారం అందడంతో తాము దాడులు నిర్వహించామని యాంటీ పైరసీ స్క్వాడ్ అధికారులు చెప్పారు. మగధీర సీడీలతో పాటు మరికొన్ని కొత్త సినిమాల సీడీలను కూడా వారు స్వాధీనం చేసుకున్నారు. మగధీర సినిమాకు విపరీతమైన క్రేజ్ ఉండడంతో వారు పైరసీ సీడీల తయారీకి పూనుకున్నట్లు చెబుతున్నారు.