మగధీరకు నెట్ పైరసీ బెడద

హైదరాబాద్: రామ్ చరణ్ తేజా మగధీర సినిమాకు నెట్ పైరసీ బెడద పట్టుకుంది. నెట్ పైరసీ ద్వారా మగధీర సినిమాను ప్రపంచ వ్యాప్తంగా చూసేందుకు వీలుగా అప్ లోడ్ చేశారంటూ ఒక ప్రైవేట్ తెలుగు టీవీ చానెల్ వార్తా కథనాన్ని ప్రసారం చేసింది. ఆ వెబ్ సైట్ లో మగధీర సినిమా ప్రసారం దృశ్యాలను కూడా ఆ చానెల్ చూపించింది. ప్రపంచవ్యాప్తంగా ఈ సినిమా విడుదలై విజయవంతంగా నడుస్తోంది. ఈ స్థితిలో నెట్ పైరసీ బెడద సినీ నిర్మాతకు, దర్శకుడిగా శాపంగా పరిణమించింది.

వీడియో పైరసీ చాలా సులభమని నిపుణులు అంటున్నారు. నిపుణుల అభిప్రాయాలను కూడా ఆ చానెల్ ప్రసారం చేసింది. ప్రపంచవ్యాప్తంగా సినిమా విడుదలైనందున కెనడా లాంటి ఇతర దేశాల్లో వీడియో తీసి పైరసీకి పాల్పడితే అరికట్టడం అంత సులభం కాదని అంటున్నారు. సినిమాను థియేటర్లలో వీడియో చేసి తర్వాత డెవలప్ చేసి నెట్ లో అప్ లోడ్ చేస్తారని వారంటున్నారు. పైరసీని అడ్డుకోవడానికి సాయం చేయాలని రామ్ చరణ్ తేజా అభిమానులను కోరారు.