మసూద్ మృతి నిజమే: తాలిబాన్

ఇస్లామాబాద్: తమ నేత బైతుల్లా మసూద్ మృతిని తెహ్రీక్ - ఎ - తాలిబాన్ శుక్రవారం ధృవీకరించింది. పాకిస్తాన్ లోని దక్షిణ వజీరిస్తాన్ లో ఈ నెల 5వ తేదీన అమెరికా జరిపిన క్షిపణి దాడుల్లో మసూద్ తో పాటు ఆయన రెండో భార్య మరణించినట్లు ఆ వర్గాలు చెప్పాయి. మసూద్ అంత్యక్రియలు గురువారంనాడే ముగిసినట్లు ఆ వర్గాలు తెలిపాయి.

మసూద్ మృతి నేపథ్యంలో అమెరికాకు వ్యతిరేకంగా పోరాటాన్ని కొనసాగించేందుకు తాలిబాన్లు కొత్త నేతను ఎన్నుకునేందుకు త్వరలో సమావేశం కానున్నారు. మసూద్ అమెరికా దాడుల్లో మరణించి ఉండవచ్చునని అంతకు ముందు పాకిస్తాన్ ఇంటీరియర్ మంత్రి రెహ్మాన్ మాలిక్ చెప్పారు. మసూద్ మరణించినట్లు తమకు సమాచారం ఉందని, ఆయితే దాన్ని ధృవీకరించే ఆధారాలు లేవని ఆయన అన్నారు. మసూద్ మరణించి ఉండవచ్చునని, అయితే దాన్ని ధృవీకరించలేమని అమెరికా అధికార వర్గాలు కూడా అన్నాయి.