నవల కాపీ వివాదంలో మగధీర

హైదరాబాద్: ప్రజారాజ్యం పార్టీ అధినేత చిరంజీవి తనయుడు రామ్ చరణ్ తేజ నటించిన మగధీర చిత్రం మరో వివాదంలో చిక్కుకుంది. మగధీర చిత్రం కథ, స్క్రిప్టు తన నవలకు కాపీ అని చండేలీ అనే నవలా రచయిత ఆరోపించారు. సన్నివేశాలతో సహా ప్రతి విషయాన్ని కాపీ కొట్టారని ఆ రచయిత శుక్రవారం ఆరోపించారు. కాగా, మగధీర సినిమాలో అశ్లీల నృత్యాలున్నాయని ఆరోపిస్తూ, వాటిని తొలగించాలని కోరుతూ బందరు కోర్టులో మరో పిటిషన్ దాఖలైంది.

ఏం పిల్లో ఎల్దమొస్తవా అనే పాటను సినిమాలో వాడుకోవడాన్ని ఆ గేయ రచయిత వంగపండు ప్రసాదరావు ఇప్పటికే విమర్శలు చేస్తున్నారు. ఈ సినిమా నిర్మాత, దర్శకుడు, హీరో బహిరంగ క్షమాపణ చెప్పాలని, ఆ పాటను సినిమా నుంచి తొలగించాలని ఆయన డిమాండ్ చేస్తున్నారు. ఆ పాట స్ఫూర్తిని దెబ్బ తీసే విధంగా సినిమాలో వాడారని ఆయన ఆరోపించారు. న్యాయవాదులను కించపరిచారని ఆరోపిస్తూ ఒక న్యాయవాది సినిమాపై కోర్టులో పిటిషన్ దాఖలు చేశారు.