జీవిత రహస్యాలతో రేఖ పుస్తకం

ముంబై: తన జీవిత రహస్యాలన్నింటిపై బాలీవుడ్ అందాల నటి రేఖ నోరు విప్పనున్నారు. వాటితో ఆమె ఒక పుస్తకం రాయడానికి సిద్ధపడుతున్నారు. అంతే కాదు, తన జీవిత కథ ఆధారంగా ఓ సినిమా తీయడానికి కూడా ప్రణాళిక సిద్ధం చేసుకుంటున్నారు. గత జీవితంలోని జ్ఞాపకాలను పోగు చేసుకుంటున్నానని రేఖ అంటోంది. తన వ్యక్తిత్వం రూపుదిద్దుకోవడానికి, తనను ప్రేమించదగిన వ్యక్తిగా రూపుదిద్దడానికి ఉపయోగపడిన ప్రతి ఒక్కరినీ తాను గుర్తు చేసుకోదలుచుకున్నట్లు ఆమె చెబుతోంది.

తనకు ఎనలేని ప్రేమను పంచిన తన తల్లి అందులో ప్రధానంగా ఉంటుందని ఆమె అంటోంది. తన జీవితానుభవాలను గుర్తు చేసుకుంటున్నానని, తనను ఈ స్థానంలో నిలబెట్టినవారికి కృతజ్ఞతలు చెప్పుకుంటానని రేఖ అంటోంది. తన కృతజ్ఞతలను పదాల్లోనే కాకుండా దృశ్యరూపంలో కూడా వ్యక్తం చేస్తానని ఆమె అంటోంది. రెండు నెలల్లోగా తన ప్రాజెక్టు ఒక కొలిక్కి వస్తుందని చెబుతోంది.