రాజీనామాపై ఆలోచిస్తా: నన్నపనేని

హైదరాబాద్: శాసనమండలికి రాజీనామా చేసే విషయం ఆలోచిస్తానని తెలుగుదేశం ఎమ్మెల్సీ నన్నపనేని రాజకుమారి అన్నారు. శాసనమండలి సభ్యురాలినైన తనకే న్యాయం జరిగే పరిస్థితి లేదని ఆమె ఆవేదన వ్యక్తం చేశారు. తనకు గౌరవం లేనప్పుడు తనకు పదవి అవసరం లేదని, సొంత పార్టీ సభ్యులు కూడా తనకు సహకరించడం లేదని, తనకు జరిగిన అన్యాయంపై మాట్లాడే అవకాశం ఇవ్వడం లేదని ఆమె అన్నారు.

కారంచేడులో తనపై దాడి చేయించిన దగ్గుబాటి వెంకటేశ్వరరావును స్వర్గీయ ఎన్టీఆర్ కుటుంబ సభ్యుడిగా కాకుండా ఒక శాసనసభ్యుడిగా మాత్రమే చూడాలని ఆమె శుక్రవారం మీడియా ప్రతినిధులతో అన్నారు. కారంచేడు దగ్గుబాటి వెంకటేశ్వర రావు తనపై దాడి చేయించారని ఆమె ఆరోపించారు. ఇది తన వ్యక్తిగత ఆస్తి తగాదా కాదని, పార్టీ వ్యవహారమని, ఈ విషయంలో మండలిలో విపక్ష నేత దాడి వీరభద్రరావు తనకు సహకరించలేదని, వాకౌట్ చేస్తే ఎవరూ రాలేదని ఆమె అన్నారు. కారంచేడు వెళ్లి తప్పు చేశానన్న బాధ కలుగుతోందని ఆమె అన్నారు. తిట్లు, తన్నులు ఎందుకు తిన్నానా అని అనిపిస్తోందని ఆమె అన్నారు.