దేవేందర్ గౌడ్ బాటలో తమ్మినేని?

హైదరాబాద్: ప్రజారాజ్యం పార్టీ నేతలు తమ్మినేని సీతారాం, కిమిడి కళా వెంకట్రావు టి. దేవేందర్ గౌడ్ బాటలో నడవడానికి సిద్ధపడినట్లు సమాచారం. వారిద్దరు కూడా తమ సొంత గూటికి చేరుకోవడానికి మార్గం సుగమం చేసుకున్నట్లు వార్తలు వస్తున్నాయి. వారు త్వరలోని ప్రజారాజ్యం పార్టీకి రాజీనామా చేసి తెలుగుదేశం పార్టీలో చేరబోతున్నట్లు తెలుస్తోంది. అందుకు తెలుగుదేశం పార్టీ అధ్యక్షుడు నారా చంద్రబాబు నాయుడు పచ్చ జెండా ఊపినట్లు వార్తలు వెలువడుతున్నాయి. సీతారాం, కళా వెంకట్రావు చాలా కాలంగా ప్రజారాజ్యం పార్టీ కార్యకలాపాలకు దూరంగా ఉంటున్నారు.

నిజానికి దేవేందర్ గౌడ్, పెద్దిరెడ్డిలతో పాటే వారిద్దరు కూడా తెలుగుదేశం పార్టీలో చేరాల్సి ఉండింది. అయితే ఉత్తరాంధ్ర తెలుగుదేశం నాయకుడు కె. ఎర్రంనాయుడు వారిని తిరిగి పార్టీలో చేర్చుకోవడం పట్ల తీవ్ర అభ్యంతరం తెలిపినట్లు తెలుస్తోంది. దానివల్లనే వారి చేరికలో జాప్యం జరిగినట్లు ప్రచారం జరుగుతోంది. పార్టీని బలోపేతం చేసుకోవడానికి మాజీలను చేర్చుకోవాల్సిన అవసరం గురించి చెప్పి ఎర్రంనాయుడు చంద్రబాబును ఒప్పించడానికి సమయం తీసుకున్నట్లు చెబుతున్నారు. పాత కాపులను చేర్చుకోవడం ద్వారా పార్టీ బలోపేతం అవుతుందని, అదే సమయంలో ఎన్నికల్లో తీవ్రంగా నష్ట పరిచిన ప్రజారాజ్యం పార్టీని బలహీన పరచాల్సిన అవసరం ఉందని చంద్రబాబు భావిస్తున్నట్లు సమాచారం.